Labour i sendem moa couple i ko wok ovasi

Labour Dipatmen wetem wan popula agent blong ol seasonal wokman i stap sendem naoia ol couple i ko wok long Pacific Labour Scheme mo Seasonal Workers Program long Australia blong katem daon ol social afea bitwin ol wokman.

Labour Commissioner, Murielle Metsan Meltenoven, i bin tok strong long isu blong ol seasonal wokman we oli stap kat ol niu afea ovasi blong mas rispektem famili blong olgeta.

Patrice Kuaotonga, Senior Labour Ofisa blong Labour Dipatmen, i talem tingting ia i blong help katem daon ol problem we plante wokman i stap involv long hem taem oli ko ovasi blong wok long Australia mo New Zealand.

Hemi talem se dipatmen blong Labour i traem bes blong katem daon isu ia we ol wokman i kat patna long Vanuatu mbe taem oli ko ovasi, oli ko kat ol niu patna bakeken.

“Long Pacific Labour Scheme program blong tri yia ia, yumi trailem ap wan grup we ol couple i stap insaed long hem,” Mr Kuatonga i talem.

“Sam grup blong ol couple ia oli jes ko nomo long Australia i no longtaem i pas.

“Mo yumi redi long sam moa blong ko long nekis wan.

“Sapos ol fama blong Australia oli jusum se oli wantem ol couple blong oli ko long nekis grup, yumi sendem olgeta i ko.”

Sylvie Kalmet, wan aproved agent blong ETM consultancies, i talem se blong stopem social isu we i mekem plante broken hom tete, hemi sendem ol hasban mo waef i ko wok tuketa long wan fam long manis ia.

“Sapos yu lukluk gud, wan grup blong mi ia we oli bin aot long manis ia, hemi ol man mo woman blong olgeta wantem,” Mrs Kalmet i talem.

“Yumi mas promotem plante tu gender equaliti mo wei ia nomo bae yumi help blong daonem ol social isu ia bitwin ol wokman.”

Wan Ni-Vanuatu we hemi pat long Seasonal Workers Program long Australia, Otisson Malsale, i talem se hemi biliv se grup we oli stap ko blong wok ia bae oli kambak blong helpem Vanuatu folem COVID.

Labour Commissioner, Mrs Meltenoven, i talem toktok ia folem plante konsen long social rilasensip bitwin ol seasonal wokman blong Vanuatu long Australia mo New Zealand.

Hemi talem se isu ia i had blong kontrolem mbe ol pipol ia we oli involv long hem taem oli kasem Vanuatu, oli stap long blacklist blong nomo travel.

“Sam isu we i stap hapen olsem ol nara maritial afea o niu rilationsip, Ofis blong Labour i konsitarem rili serious mo stap wok wetem New Zealand mo Australian High Commission blong karem bak olgeta i kambak, “Mrs Meltenoven i talem.

“Ol social isu ia i kam antap from stay blong ol wokman i long mo blong oli manejem wan long distens relationship samtaem hemi had.

“Mbe mi wantem apil long ol wokman se bifo oli pat long program ia, oli mas tinkbaot se ol famili memba mo komuniti nao i kivim sapot blong oli ko wok mo kasem vatu.”

Wan nara wokman we bae hemi pat blong Pacific Labour Scheme blong tri yia blong fastaem, Michael Cakau, i talem se hemi wan single man mo hemi ko blong wok wetem tingting blong helpem famili blong hem long Vanuatu.

“Mifala grup ia, bae mifala wok long abbatoir o ples blong mit,” Mr Cakau i talem.

“Mifala i niu long program ia mbe mifala i trastem papa God nomo oltaem se hemi stap wetem mifala.”

Dipatmen blong Labour wetem Australia High Commission i gat strong biliv se ol wokman ia taem oli finisim kontrak blong olgeta mo stap kambak long Vanuatu, oli save statem wan bisnis mo leftemap save blong ol long wan wok ples.

Labour mo Agriculture dipatmen i stap wok long wan polisi pepa blong kivhan long ol wokman taem oli kambak blong invest long graon.

(Visited 2216 times, 1 visits today)

About The Author

You might be interested in