Labour i wonem wan Australian farm kampani

Labour Dipatmen i wonem se wan kampani blong Australia i save blacklist sapos hemi no fixim ol welfea isu blong ol Ni-Vanuatu Seasonal Wokman.

Hemia afta we dipatmen i anaonsem long eli wik ia se bae oli isuem wan temporari saspensen blong kampani ia i nomo rikruit long Vanuatu.

Commissioner blong Labour, Muriel Metsan Meltenoven, i talem se Vanuatu hemi tekem welfea isu olsem tumas ditaksen long pei blong ol wokman ovasi i serious.

Mrs Meltenoven i talem se hemia sins midel blong 2020 we oli stap karem ol komplen abaot kampani ia.

“Mifala i liase wetem Vanuatu High Commissioner long Canberra, Australia mo hemi pesonali sendem fes secretary blong hem i ko raon raon table wetem Pacific Labour Fasiliti mo Manager blong kampani konsen,”Mrs Meltenoven i talem.

“Mbe yumi luk se afta long ol miting ia, owna i mas wok long ol isu ia folem outkam blong miting we i kat ripresentativ blong Vanuatu mo Australian Kavman mo kampani ia.

“So taem hemi no mekem folem ol taem fraem we yumi bin putum, hemi no givim choice long mi mbe mi mas kanselem mo saspendem enkejmen blong hem wetem Vanuatu.

Dipatmen blong Labour i no rilisim nem blong kampani ia yet. Mbe kampani ia hemi rikruitum vinis ova 100 Ni- Vanuatu wokman.

“Bae yumi kontinu blong monitarem kampani ia mo sapos hemi no fixim ol isu ia bae yumi blacklistim hem,” Mrs Meltenoven i talem.

Mrs Meltenoven i kol long ol wokman blong oli patient wetem wok we labour dipatmen hemi stap mekem blong fixim ol isu ia we i afektem bigwan ol wokman.

VBTC Nius i luk long social media, plante wokman i stap post folem sam welfea isu we oli stap fesem long ol farm ovasi.

Mo Mrs Meltenoven i talem se i kat ol proses we Labour Dipatmen i mas wok folem blong adresem ol ripot we oli risivim.

Hemi talem se ol isu ia hemi prioriti blong labour i adresem.