Lajmoli airpot i wan prioriti

Kavman i talem se bae i wok blong putum bak seves blong Lajmoli airpot long Not West Santo blong sapotem ol pipol long transpot.

Long 28 October wan test flaet i hapen bakeken long airpot ia we ol pipol blong Not West Santo i witnesem.

Afta long had wok, gud nius i kamaot se test flaet bae i tekem ples, mo nius ia i mekem ol pipol long i kam tugeta blong witnesem.

Wan lokol we i bin help long man pawa blong klinim eria ia, Goss Peter i talem se tes flaet ia  i bringim hop long ol pipol blong West Coast mo Not West Santo blong travel ariap i ko long town mo tu blong help long taem we wan man i sik mo i nidim moa tritmen.

“Grass ia mifala i bin katem gud i ko daon from bae i isi blong plane i lan mo take off,”Mr Peter i talem.

“Mifala i yusum hand nomo blong katem klinim bigfala eria ia mbe from mifala i rili wantem plane seves i kambak.

“Ol lokol i komplae fulwan long rikwest blong rutum aot ol strong grass ia we oli kosem obstacle long plane blong karem stret take spid blong hem o sapos no i save spolem landing gear blong wan aircraft.”

Antoine Malsungai, Pablik Relasen Ofisa blong Ministry blong Infrastructure mo Pablik Utilities, i talem se kavman i wantem Lajmoli airport i operate bakeken.

“Hemi wan wish blong kavman blong ri-lonjem airport ia mo hemia nao resen from wanem ol ofisa blong Civil Aviation Authority tim i ko daon long Santo blong lukluk long ol technical isu we i stap afta we i no bin yus longtaem,” Mr Malsungai i talem.

Hemi ova long 10 yia we Lajmoli airpot ia i nomo operate folem wan plen crash long 2008 folem wan tik fog we i mekem pilot i nosave luk ples i klia.

Mo risal blong plen crash ia, pilot i ded mo sam pasenja i kasem ol kil long bodi blong olketa.

Area Administrator blong North West Santo, Vula Charlie, i talem se taem airport i nomo operate i mekem pipol i kontinu blong spend plante long bot mo land transpot blong ko long ol ples we oli wantem kasem.

Hemi talem se ol pipol i spendem VT40,000 long wan wei nomo blong ko long Luganville town.

Ol risponsibol otoriti i bin inspektem runway blong plane tu long taem ia.

Tu pilot blong Air Taxi i land long airstrip ia bakegen folem apruvul blong Civil Aviation Authority, tru long Assistant Director, Nayani Karu.

Kavman bae i mekem save moa apdeit long ol nekis developmen long airpot ia long ol taem we i kam.

Sakses blong storian ia i rely bigwan tu long komitmen mo resilience blong pipol blong Olpoi, Wunon, Valpei mo ol narafala vilij long aelan blong Santo.

 

 

 

 

 

(Visited 135 times, 1 visits today)

About The Author

You might be interested in