Lida blong uniti i lus

Vanuatu i lusum wan tru lida we i wok wetem evri pipol blong meintenem uniti.

Leit Pastor Allan Nafuki i lusum laef blong hem long wiken.

Vanuatu Christian Council of Churches i discribem Leit pastor Allan Nafuki olsem wan lida blong unity.

Leit Pastor Allan Nafuki blong Erromango i bin lusum laef blong hem long hom blong hem long Port Vila.

Secretary General blong Vanuatu Christian Council, Ps Shem Temar, i talem se leit Ps Nafuki i bin involve long wok blong Papa God blong longtaem tumas.

Hem i diskraebem hem se hemi wan man we i kat pasen long wok ia.

“Leit Pastor Allan Nafuki hemi wan tru lida we hemi toktok mo hemi ripresentem ol jej long evri difren sekta,” Ps Temar i talem.

“Mo evri difren level blong othoriti long rigen mo long wol tu.

“Hemi wan lida we hemi mekem sua se Christianity, taem yumi talem se Long God yumi stanap hemi mas oltaem riflek insaed long evri sekta ia.

“Mo hem ia i wan bigfala loss long Vanuatu.”

Pastor Temar i talem se leit Ps Allan Nafuki i tok plante abaot independen blong tufala kaontri long Pacific.

“Hemi wantem fridom blong Kanaky mo West Papua pipol,” Ps Temar i talem long VBTC Nius.

“Hemi wan man we hemi beis long time, hemi wellspoken mo hemi wan tru lida from hemi enkarejem plante indigeous lidasip.

Foma Prime Minista blong Vanuatu, Joe Natuman, i talem se Vanuatu i lusum wan strong nabanga blong hem long eli wik ia.

Mr Natuman i bin skul wetem leit Ps Allan Nafuki long Onesua High skul long yia 196o’s we naoia i jens i ko long Onesua Presbyterian College.

Long taem ia i kat sam fren blong hem oli skul from pastor mo oli bin help long taem blong Independens we wan nao leit Pastor Allan.

Mr Natuman i talem se Tafea mo Vanuatu i lusum wan tru mo humble man.

“Mi sori we sori tumas blong harem nius ia,” Mr Natuman i krae.

“Hemi wan konses blong nation we plante man i nosave mbe hemi minim nomo olsem se taem yumi ko lusum rod, mbe Ps Allan i stap blong talem se rod ia nao.

“Mi bin wan we mi involv long politik kasem taem Pastor Allan i kam joinem mi long 1990’s.

“Hemi kam Memba blong Palemen blong Tafea Outer aelan.”

Freddy Waromi, West Papua Ofis caretaker long Port Vila i talem se oli arem nogud tumas.

“Ova long 300,000 populasen blong Vanuatu, mi talem tankiu tumas from yufala kat wan man we hemi komit bigwan long isu blong stragol blong fridom blong West Papua,” Mr Waromi i talem.

“Bae mifala i save rimembarem hem, mifala i save putum hem long golden rikod blong mifala.

“Leit Pastor Allan i bin talem long mi se, mi hop se bae West Papua i tekem independens ariap blong yumi tu ko luk eria longwe.

“Mbe mi arem nogud tumas from mi mestem hem.”

Pastor Temar i talem se leit pastor i stap long age blong 70.

“Mifala i awea se hemi kat sik mo hemi nidim rest mo Presbyterian jej blong Vanuatu i bin askem leit pastor blong hemi step daon,” Pastor Temar i talem.

“Even Vanuatu Christian Council i bin toktok long hem blong mas kat sam rest mbe wanem hemi talem se bae hemi wok kasem taem blong hem i en.”

Plante Pablik servant, olketa long private sektor, kavman mo pablik i bin ko sherem sori long Malasitapu jej long tete.

Leit Pastor Allan Nafuki bae i kobak long hom aelan blong hem long Erromango blong rest.

 

(Visited 302 times, 1 visits today)

About The Author

You might be interested in