Limit COVID ristriksen-Opposition

Opposition i kol blong katem daon ol COVID ristriksen mo ol samting i kobak nomol.

Lida blong Opposition, Ralph Regenvanu, i konsen se taem Kavman i traem blong kontenem sik mo enfosem ol mesa, COVID kes i ko hae bitim mak.

Mr Regenvanu i talem se naoia kavman i nid blong putum moa mani long health blong impruvum seves from taem disisen i made mbe i nogat enfosmen.

Hemi kleim se i kat politik long hao hemi dil wetem situasen.

“Insaed long kaontri yumi kobak long wok nomo; letem evriman i wok. Ol skul i open.  Kavman i nid blong putum mo mani long health blong dil wetem ol sik. Mo letem ol samting i ko hed nomol,” Mr Regenvanu i talem long VBTC Nius.

“Yumi kipim international boda i klos fastaem mbe alaoem repatriation i ko hed olsem bifo.”

“Yumi luk wan samting olsem we i hapen tu taem vinis we wan oda blong curfew i vinis, i nogat nara wan i kamaot. Long 24 haoa, i nogat eni oda blong curfew i mekem se man i save wokbaot mo afta tu dei oli putum bak.  So dilei blong mekem disisen, nogat akses long infomesen hemi no luk gud nating long kavman. Mo hemi soem se kavman ia hemi no unite bihaed long wan tinktink blong traem blong kontenem o kontrolem, mi nosave wanem hemi strategy blong kavman.

“Mi luk olsem oli traem blong kontenem mbe long semtaem taem oli enfosem ol mesa, transmisen i stap ko bitim mak. So wanem nao ol mesa we yumi stap tekem sapos yumi no enfosem.

“Mi nosave se wanem program mbe politikol interferens hemi wan.”

Long narasaet Deputy Prime Minsita, Ismael Kalsakau i talem se kavman hemi stap lukluk long ol opsen ia mo bai hemi investem VT1.3 billion long Vila Central Hospital.

Hemi talem se hemi wan gudfala tinktink we Opposition i givim.

“Council blong ol Minista bae i mit tumoro(Thursday) blong diskasem long arejmen blong Port Vila mo Santo,” Mr Kalsakau i talem.”

Mr Kalsakau i admitim se hemi wan jalenj blong dil wetem pandemic witaot stret data.

“Mifala ol Council blong ol Minista i nid blong karem ol stret infomesen blong save mekem ol disisen,” Mr Kalsakau i talem.

“Long pas tu wik, yumi stap luk ol kes namba nomo we i stap inkris mbe i nogat wan stret evaluasen long hao sik i stap kam antap. Evri infomesen ia mifala i stap traem blong sendem i kobak long ol ofisiol mbe ol infomesen ia i no availabol i mekem se mifala i ko stap visitim olgeta.

“Mo yumi faenem aot se ol ofisiol we oli stap wok long Korman oli rili keaful mbe yumi nid blong exchangem infomesen nomo blong oli save wanem nao ol expektesen blong kavman.”

Long semtaem Deputy Prime Minista hemi talem se i kat kwik nid blong strong colaboration bitwin ol stakeholda.