Loa blong adoptem wan pikinini

Vanuatu i plan blong kat loa blong save adoptem wan pikinini.

Director General long Ministry blong Justice mo Community Service, Dorosthy Kenneth Watson,  i talem se hemi wan niufala bill we bae i riplesem adopsen akt blong kondominium Kavman we Vanuatu i bin yusum i kam kasem long tete.

Hemi talem se adopsen hemi bin stap longtaem mbe i nokat wan legal fremwok mo propa prosija blong luksave fomol proses blong hem.

“Bill we hemi kam, hemi givim pawa long Director General wetem Minister long Ministry blong Justice blong oli mekem ol polisi, oli divelopem proses mo prosija blong manejem seves ia blong eni man o woman i save adoptem pikinini long kaontri,” Mrs Watson i talem.

“Long Vanuatu bifo i kam, yumi stap yusum ol loa blong United Kingdom we i lukluk long adopsen blong wan pikinini mbe i olfala tumas from hemi blong 1958  i kam.

“Mo even franis loa i alaoem yumi tu blong mekem adopsen.

“Yumi save se afta long 40 yia ia, situasen blong ol pikinini i stap kam antap we i kivim yumi opotuniti blong putum inples ol proses ia nao.”

Chief Executiv Ofisa blong Malvatumauri Council blong ol Chief, Jean Pierre Tom, i talem se adopsen loa i no festaem blong i ko long Palamen.

Hemi talem se loa i no mas luk long welfea blong pikinini nomo be hemi mas adresem ful laef blong hem.

“Wetem principal blong bill, mifala i akri wetem tinktink se taem wan pikinini blong Vanuatu i bon, hemi wan pikinini blong wan nasara mo hu we bae i adoptem hem, i mas lukluk long longtaem plan blong wan pikinini,” Mr Tom i talem.

“Mifala i bin reisem konsen ia i ko long Ministry risponsibol from insaed long bill ia oli talem se i no luksave impotens blong kastom adopsen.”

Memba blong Palamen blong Tanna, Andrew Napuat, i talem se, “Mi askem long kavman blong i widroem bill blong adopsen from i mas ko toktok wetem ol jif mo ol pipol fastaem.”

“Adopsen tete i kat plante jalenj blong hem olsem language mo kraon mo hemia bambae Malvatumauri i mas karem i ko bak long everi aelan blong yumi from sapos yumi no keaful naoia we yumi stap kriatem program blong citizenship bae i afektem language mo baondri long saed blong kraon,” hemi talem.

“Mo hemia i save mekem dispute long futja mo mi askem kavman blong posponem bill ia.”

Director General Dorosthy i talem se wan long olkgta eim blong loa ia hemi blong mekem sua se taem adopsen i tekem ples, konsiderasen blong kastom mo kalja blong pikinini hemi impoten mo paramaont.

“Mifala i bin toktok wetem Malvatumauri Council blong olgeta jif blong klirem bill ia mo talem se bill ia i no regulatem informal adopsen o wanem yumi kolem kastomari adopsen mbe hemi lukluk long fomol adopsen we hemi givim pawa long kot blong disaed long adopsen.

Hemi no klia yet se niufala adopsen bill ia bae i tebol long Palemen sesen ia o nokat.

Ministry blong Justice mo Community Service bambae i tebolem bill ia.

 

 

 

 

 

 

(Visited 454 times, 1 visits today)

About The Author

You might be interested in