Loan prodak blong Rural Development Bank

Vanuatu Rural Development Bank i lonjem tu loan prodak long wik ia.

Apliksesen i open blong man i aplae naoia.

VBTC Nius i talem se program ia i setap blong leftemap economic stimulus long ol rural bisnis.

Glen Craig, Administrata blong Vanuatu Rural Development Bank, i talem se apliksen i mas kam wetem wan bisnis plan bifo bank hemi givim aot mani.

“Sapos wan man i wantem borrow VT100,000 long bank, mifala i wantem save hao nao bae yu mekem inkam o profit aot long mani ia,” Mr Craig i talem.

“Mo hao nao bae i benefitim ekonomi blong yumi from mani we yumi givim aot hemi blong pipol blong Vanuatu so yumi nid blong mekem sua se tinktink blong man i tekem mani, hemi mas mekem sua se i kat inkam i kambak blong save pem bak loan.

“So bae pipol i no pem bak loan blong fes six manis blong mekem sua se i isi blong ripei.”

Two loan product ia, wan hemi, ‘Yumi Growem loan’ fand ia hemi blong asistim wan bisnis we hemi redi blong stat o sapotem wan bisnis we hemi nidim sapot long capital- mani blong statem wan bisnis blong hem. Seken loan we hemi ‘Evridei loan’ hemi blong sapotem impruvmen blong ol propeti o pem tul blong wan bisnis we i operate vinis.

Mr Craig i talem se i kat plan i stap blong team i ko raon long ol aelan blong seves ia i kasem olgeta.

“Plan blong rilisim prodak ia i ko long aelan, bae i kat tu ofisa i ko long Not kasem Saot blong Vanuatu,” Mr Craig i talemaot.

Mr Craig i talem se longwe pa oli aploadem loan infomesen mo lending aplikesen pa ol ofisa long Vila i help.

I kat araon 300 pipol finis i ko fulumap aplikesen blong loan mo namba ia hemi stap ko antap mo hemia i soem se ol bisnis ol nidim sapot long taem blong COVID-19 Pandemic.

Bank ia i kat wan low interest reit blong 4 per cen insaed long kaontri.

Kavman i handem ova VT600 million long Rural Development Bank long Decemba blong groem ol lokol bisnis. Kavman bambae hemi givim wan total blong VT1.1 billion long program ia, so VT500 million i stap yet blong hemi givim yet.

Minista blong Finance mo Economic Management, Honoroble Johnny Koanapo, i enkarejem ol pipol blong oli mas mek yus long mane ia blong kriatem ol bisnis we i save gro mo no misyusum ol mane we oli karem long bank.

 

 

 

(Visited 723 times, 1 visits today)

About The Author

You might be interested in