Lokdaon simulation exercise long Novemba

Ministry blong health i talem se simulation lokdaon exercise bae i hapen long fes wik blong November.

Director blong Public Health, Len Tarivonda, i talem se bae oli mit long wiken ia blong diskasem gud detail plan blong exercise ia.

Hemi talem se long Monday bae oli jes talemaot gud infomesen abaotem.

“Naoia we i stap, detail plan blong simulation exercise we kavman bae i engage long hem i no komplete yet,” Mr Tarivonda i talem.

“So olsem pablik i save, yumi bin ripotem se yumi wantem exercise ia blong hapen long 21, 21, 22  October mbe mifala i diferem dei ia i ko long November.

Hemi talem se bae lokdaon exercise i hapen afta long event blong Fes Napuan.

“I kat wan Palemen sitting tu long November so bae mifala i traem blong fidim in stret deit mo Monday yumi sud kat moa infomesen afta long miting long Sunday(tete),” Mr Tarivonda i talem.

Director Tarivonda i talem se i stil gat diskasen wetem ol bisnis haos folem sam konsen we oli reisem.

“I kat tumas kwesten we pablik i sutum i kam olsem bambae detail lokdaon exercise ia i kompensatem ol bisnis o wetaem bae i hapen, ol kwesten olsem hemi gud from yumi wantem se pablik i wea mo pat simulation exercise ia,” Mr Tarivonda i talem.

“Mbe mi wantem se talem se mifala i stap lukluk long detail yet, might bambae i no nidim wan komplete lokdaon long Port Vila o Efate aelan, might selektiv lokdaon scenio long simulation exercise nomo olsem long ol skul, komuniti, jej; ol specifi eria we tim i stap wok long hem yet.

Hemi talem se lokdown ia bae i stap long tri dei mbe hemia i save jenis afta long miting long Sunday(tete).