Ol upgrade wok blong Luganville Soccer City Stadium bae i stat i no long taem.
Minister blong Youth mo Sport, Willie Pakoa Satearoto, tugeta wetem President blong Vanuatu Football Federation, Lambert Maltock, i sainem renewal blong contract blong stadium ia long las wik.
First stage blong stadium ia hem i bin hapen vinis we i lukim oli putum daon olfala stadium mo buildim niu wan.
President blong Vanuatu Football Federation, Lambert Maltock, i talem se naoia bae oli karemaot ol temporari fenis redi blong putum permanent fenis i ko antap.
“So naoia bae yu luk se bambae mifala i mekem fenis bae hem i nomo fenis olsem barbwire raon long hem mbe bambae hem i cement concrete fence we bae i raonem gud eria ia,” President Maltock i talem.
“Bambae i gat ticketing haos tu we bae i stap long gate o entrance blong stadium ia. Bae i semak tu long Freswota Stadium we bae i gat wan ticketing haos tu blong hem.
Vanuatu Football Federation i securum VT18 million vinis olsem mani blong development ia.
Mr Maltock i kontinu blong talem se narafala upgarde hem I blong oli putum wan permanent grand stand we bae i save akomondatem big namba blong ol pipol blong wajem futbol.
Director General long Ministry blong Sport, Henry Vira, i talem se hem i hapi long development ia from bae hemi benefitim ol pleia.