Moa aksesibol seves-VSPD

Vanuatu Society for People with Disability i wantem moa aksesibol seves taem bildim ol infrastraja.

Engagement Ofisa long Vanuatu Society for People with Disability, Arthur Simrai i talem toktok ia long VBTC Nius long wik ia.

“Mifala i fesem jalenj from i nogat asesibiliti blong mifala long town mo long aelan i moa had olsem toilet mo rod,” Mr Simrai i talemaot.

“I no sef blong ron long wheelchair pas long rod blong trak mbe mi olsem mi ron oltaem mo ples we ol nara wan i yusum wheelchair bae oli kam ia oli fraet. Wan taem mi stap staon long hotel Rossi ia mo oli tekem wan turis wetem disability i ko long baot, oli tekem hem wetem wheelchair ko bot mo kolosap oli foldaon.

“Long town blong yumi tu, ol toilet ia oli se hemi akses mbe taem mifala i ko, oli no wok, oli klos. I no mifala nomo, yumi turis destination, ol turis oli kam wetem wheelchair blong ko toilet oli fesem had taem. Wan taem mi stap long plesia, oli kam blong ko toilet longwe mbe i klos nomo, oli harem nogud so mifala wantem laef blong mifala i isi olsem mifla i nomol long laef. So wanem mi stap mekem hemi blong wok tugeta wetem ol eria blong mekem akses long wan disability.”

“Mi tu mi travel plante taem mi mekem field wok i ko long ol aelan, mbe wea ples mi ko mi fesem had taem espeseli long ples blong toilet mo ples blong swim,” Mr Simrai i talemaot.

“Taem mi enterem wan vilij, oli se pa yu slip long plesia ia, fes samting mi lukaotem toilet, vila slo slo kam gud mbe long ol aelan i longwe mas mekem awenes blong pipol i save wok blong wan pipol wetem disability long komuniti.”

Mr Simrai i talem se i hard long hem blong ko putum ripot long Polis station from i nogat wan eria blong wheelchair blong hem i save pas long hem.

“Samtaem ol polis i kam sevesem mi nomo long town. ol shop i moa hard blong ko lem blong pem kakae,” Mr Simrai i talemaot.

“Justice Ministry nomo we mifala i stap anda long hem mbe mifala i nosave ko lem blong tokbaot ol isu blong mifala from i kat ladder. Plesia nao mifala i sud kat akses long hem from mifala i stap anda long hem. Hospital naoia hemi oraet blong mifala i save ko long hem.

Mr Simrai i talem se naoia kavman i stap inkludum hem long ol bilding olsem Grand hotel, ol bank blong i isi taem oli tekem in ol pipol wetem disability.

Hemi talem se naoia faev pipol long Vanuatu Society for People with Disability oli wok.

“Mo long ol ples i kat sam nomo oli akseptem mifala blong wok mbe sam no yet. Oli lukluk disability so bifo hemi kam yu lukluk long abiliti long wanem nao hemi save mekem,” Mr Simrai i talemaot.

“Fulap oli no skul gud i mekem se i hard blong oli aplae from wok. Wanem mifala i stap mekem i blong mekem se oli involv long komuniti mo pat long ol aktiviti blong helpem laef.”

(Visited 87 times, 1 visits today)

About The Author

You might be interested in