Lycee Louis Antoine de Bougainville blong tekem lokol saplae

Lycée Louis Antoine de Bougainville long Port Vila bae i risivim ol saplae blong lokol kakae long yia ia.

Kavman i sapotem Indigenious Ni -Vanuatu Agro Industry Council o INAC wetem VT6 million blong saplaem ol lokol kakai i ko long Malapoa College mo Lycee Louis Antoine de Bougainville.

Vice Jeaman blong Indigenious Ni -Vanuatu Agro Industry Council, Georgy Kalo, i talem se yia ia namba blong ol pikinini bae i inkris mo bae oli nidim moa lokol kakae blong mitim demand.

Mr Kalo i talem se vatu ia hemi blong pem lokol kakae long ol fama blong six koperetiv raon long Efate long manis January mo February.

“Yia ia bambae yumi fidim ova 2,500 pikinini,” Mr Kalo i talem.

“Long saet blong logistik mo ol cooler, ol trak blong muvum kakai wetem ol bigfala oven, projek hemi sekurem wetem ol dona patna wetem araon VT43 million. Bambae yumi fidim bigfala namba blong ol pikinini mo yumi mas kat capasiti blong storem kakai.”

Long las yia, Kavman i sapotem program ia wetem VT3.6 million blong saplaem lokol i ko long 1,500 skul pikinini blong Malapoa College long Septemba kasem Decemba 2021.

Wan fama we i kat bigfala farm blong pineapple, Seru Willie, i hapi blong sapotem program blong kakai lokol mo hemi enkarejem ol fama blong saplae.

“Mi groem Pineapple blong ova 25 yia mo production blong me hemi bigwan,” Mr Willie i talem.

“Me stap sel long market mbe samtaem ol kastoma i no pem flatem, mbe wetem program blong INAC mi glad blong joen long yia ia blong sel mo semtaem fidim ol ol pikinini wetem healti kakai.”

Mr Kalo i talem se projek ia i tekem ol produsa koperativ long wan nara level from oli salem kakae i kobak long kavman wetem praes we i inkludum Value Added Tax(VAT).

Hemi talem se ol produsa koperativ bambae oli stat blong kontribut long Gross Domestic Product (GDP) blong Vanuatu.

Ol six koperativ raon long Efate oli stokem vinis tu tan blong root crop olsem manioc, taro mo kumala we bambae i saplae i ko long ol skul long February.

 

 

(Visited 225 times, 1 visits today)

About The Author

You might be interested in