Malekula COVID vaccine lonj

Malampa Province bae i lonjem COVID vaksin rolaot tumoro long Malekula.

Lojing blong COVID-19 vaccination roll out long Malampa bae i hapen long Wilkins Stadium long Lakatoro, Malekula.

Salome Kenneth, Malampa Public Health Manager mo Incident Controller blong COVID-19 vaccine roll out long Malampa, i konfemem.

Hemi talem se plan hemi blong pipol i kam tuketa long LTC, eria blong National Bank blong Vanuatu mo maj i ko kasem long Wilkins stadium.

Hem i talem se oli stap expectem moa long 200 pipol blong vaccinatem olgeta tumoro long lonj ia.

Mrs Salome i talem se oli eim blong stikim ol frantlin wokman mo bae oli muv i ko long Norsup hospitol blong stap long tu wik.

Hemi talem se afta long tu wik, bae i kat wan mobile tim i ko raon long ol station raon long Malekula blong stikim ol pipol we oli nosave kam tekem stik.

I gat wan taket population blong araon 23,000 eligible pipol long Malampa we Malampa Vaccination tim i lukluk blong vaccinatem.

Mrs Kenneth i talem se Malekula hem i fes aelan long Malampa blong rolemaot COVID vaksin mo long eli nekis yia bae Malampa Helt i lukluk blong rolem vaksin long ol nara aelan long Malampa.

COVID-19 vaccination launch long tumoro bae i ko tu wetem launching blong tri narafala vaksin we hem  I blong ol pikinin long saed blong sik phneumonia mo diahorea mo bae i gat handing ova tu blong wan GeneXpert Omni masin blong testem TB.