Malekula i redi from COVID vaccine

Malampa Public Health i talem se pipol long Malekula i redi blong tekem COVID vaccine afta long ol awenes.

Salome Kenneth, Malampa Public Health Manager mo semtaem Incident Controller blong COVID-19 vaccine rolaot long Malampa, i talem toktok ia beis long ol infomesen we ol tim i bin tekem taem oli ko aot long six eria kaonsel long Malekula blong mekem awenes long ol lokol.

Mrs Kenneth i talem se i kat six tim we ol eria administrata blong Malekula i talemaot blong oli ko expleinem wanem hemi COVID vaccine mo hao hemi save help protektem pipol blong stap sef.

Hemi talem se beis long wanem ol tim ia oli talem se ol pipol i luk fowod blong tekem vaccine.

Environmental Health Ofisa long Malampa Public Health, Xavier Watt, i talem se ol pipol blong saot Malekula i rere blong tekem vaccine from oli wantem sef sapos Vanuatu i openem boda blong hem long ol nara kaontri long Wol.

Mr Watt i talem tim blong hem i pas long ol vilij blong Vareas, Lamap, Maskelyn aelan, Avok aelan, Okai komuniti, Akham aelan, Farun, Arop mo Raniem mo Renaur komuniti mo oli kliarem plante kwesten we ol pipol i resem olsem spun i fas long skin, o bae oli ded sapos oli tekem stik meresin ia o sam oli se sapos oli tekem vaccine hemi saen blong 666.

“COVID vaccine bae i help protektem komunuti spos i gat eni futja infeksen o komuniti transmisen olsem long Fiji, Papua New Guinea mo New Caledonia; Prevention i gud moa long cure,” Mr Watt i talem.

Area Administrator blong Saot West Malekula, Gerald Tamau, i talem se ol pipol long eria kaonsel blong hem i akri blong tekem vaccine.

Mr Tamau i bin postem long pej blong Saot West Malekula long en blong September se wan tim i bin ko mekem awenes long Carolyn Bay, Toman aelan mo Melip.

Mrs Kenneth i talem se lonj blong vaccine bae i hapen long Norsup hospitol eria long 12 October wetem taget blong stikim 200 pipol.

Hemi talem se bae i kat six site taem oli operate long Norsup blong tu wik.

Mrs Kenneth i talem se afta long tu wik ia bae i kat wan mobile tim i travel aot blong station long six station. I kat Atchin Health Centre blong tu wik from bigfala populasen long Not East Malekula, wan wik long Espagles Bay, Unmet Dispensary long Not West B long wan wik, Aulua Dispensary long Saot East Malekula blong wan wik, Lamap Health Centre blong wan wik, Ahkamb Dispensary blong wan wik mo Saot West Bay Health Centre blong wan wik.

Hemi talem se eim blong olgeta se long ten wik evri pipol long Malekula i sud tekem fes dos blong COVID vaccine.

Mo afta bae oli jes wok long seken dos.

Mrs Kenneth i talem se ren long wiken i distebem awenes blong ol tim mbe long wanem hemi harem long olgeta se pipol i redi.

Hemi talem se long wik ia bae oli kat trening blong redi long vaccine rolaot.

Malekula COVID-19 vaccine awenes i bin stat long 24 September.

 

 

 

 

 

(Visited 174 times, 1 visits today)

About The Author

You might be interested in