Malo blong inkrisim fam prodaksen

Ol pipol long Malo i glad blong risivim long wik ia sam sidling mo masin blong wok long ol fam we Ministry blong Agriculture, Livestock, Forestry, Fisheries mo Biosecurity i handem ova long olgeta.

I gat wan totol blong 6,836 sidling blong kakao, 739 kofi sidling mo 200 swit aranis sidling we ministri ia i kivim i ko long ol fama long aelan blong Malo.

Ministri ia i handem ova ten drill blong planem ol sidling ia mo naen chainsaw we Reserve Bank blong Vanuatu nao i donetem.

Hem ia i blong helpem ol fama i karem bak ol plantesen blong ol crop we oli bin lusum afta long Saeklon Harold.

Director blong Agriculture, Antoine Ravo, i talem se ol sidling ia i blong sapotem replanting afta long Saeklon Harold, hem i olsem initiative blong Vanuatu i kontinu blong saplaem komoditi ia i ko long maket.

Director Ravo i talem se handing ova blong ol sidling ia i blong rikava mo inkrisim mo maltiplaem prodaksen blong kakao, vanilla mo pepper blong save tred long domestik maket mo expot maket.

Dipatmen blong agrikalja i saenem wan agrimen wetem Wesbatolomiu Farmers Association blong Malo wetem Sanma Provincial Kavman blong mekem sua se prokram ia hemi kontinu blong saplaem kakao sidling long ol fama mo helpem ol fama blong wok.

Director Ravo i talem se bambae agrikalja fil asistens blong Malo bae i mekem sua se ol fama i planem ol sidling ia mo yusum ol masin ia blong wok.

“Ol masin ia oli no mas slip, oli mas wok blong mekem se yumi inkrisim prodaksen long ol fam mo maltiplae,” Mr Ravo i talem.

“Ol fama bae oli mas planem everi kakao mo ol nara sidling ia bifo en blong manis Maj.

“Ol fama i mas yusum chainsaw mo drill blong kliarem plantesen mo planem ol sidling ia,” hem i talem.

Director Ravo i kol long ol fama long Malo blong helpem wanwan long olgeta blong yusum ol masin ia mo planem ol sidling we i ko long olgeta.

Hem i kol long Wesbatolomiu Farmers Association blong Malo blong mas provaedem wan ripot blong ol wok ia long fil asistens blong Malo mo talem se ripot ia bae i helpem ol technicians mo ol polisi meka blong mekem wan gud disisen blong helpem Malo mo Vanuatu.

Mr Ravo i talem se sapos eni fama i no mitim ol kondisen ia, bambae dipatmen blong agrikalja hem i save infomem fama blong wok o i save karemaot ol masin ia mo muvum i ko long ol nara fama long wan nara constituensi blong mekem gud yus long ol masin ia.