Malvatumauri blong selebretem 40 yia blong hem

Malvatumauri Council blong ol Jif bae i selebretem 40 yia blong hem long wik ia.

Namba faev March hemi dei blong olgeta jif raon long Vanuatu.

Jif Wemal Tuwo Vanu, Willie Grey Plasua, Presiden blong Malvatumauri Council blong ol Jif, i talem se mama loa i bin luksave Malvatumauri Council blong olgeta jif long 1980 afta long Independence.

Hemi talem se fes kakae fanksen blong Malvatumauri hemi long 1981 hemia nao long yia ia bae hemi 40 yia blong hem.

“Selebresen blong makem jifs dei long Port Vila bambae i tekem ples nomo long Saralana Park,” Jif Wemal Tuwo Vanu, Willie Grey Plasua i talem.

“Bigfala toktok blong selebresen long yia ia, hemi yumi majua mo yumi rispektem Vanuatu.

“Taem yumi talem se yumi rispektem vanuatu, yumi rispektem eni pipol olsem ol pikinini, pipol wetem spesel nid, ol woman, ol gel ol boe, ol olfala mo even ol propeti blong ol man.

“Taem yumi majua yumi stap wetem majoriti blong 40 yia blong yumi mo bae yumi rispektem Vanuatu.”

Long dei blong selebresen ya bambae i kat wan spesel seremoni i tekem ples long Saralana park long Port vila.

Jif Wemal Tuwo Vanu, Willie Grey Plasua i talem se Malvatumauri Council blong ol Jif, bae i mekem wan kastom seremoni i ko long bigfala kaonsel blong ol jif long Efate we Port Vila i stap insaed long hem.

Hemi talem se seremoni ia oli singaotem se Nasautonga.

Long las yia mifala i bin mekem wan seremoni we i lukim evri jif long ol difren, aelan we oli live long Port Vila, “Jif Wemal Tuwo Vanu, Willie Grey Plasua.

“Yumi mas givim bak respek, kivim bak hona ya i ko long ol jif we oli lukaotem Vatkorbau eria long saot Efate.

“Bambae ol pipol mo ol jif we oli liv long Port Vila o long saot Efate, oli mas respektem mo honarem ol jif blong Vatkorbau eria.”

(Visited 145 times, 1 visits today)

About The Author

You might be interested in