Malvatumauri i askem sapot blong ol jif

Malvatumauri Council blong ol Jif i mekem wan kwik kol i ko long olgeta jif long Vanuatu blong kivim ol tinktink blong helpem Kavman faenem ol wei blong berem ol ded man long Port Vila long futja.

Jif Wemal Tuwo Vanu, Wille Grey Plasua, Presiden blong Malvatumauri Council blong ol Jif, i talem se hemia folem tinktink we Port Vila Municipal Council i kat blong introdusum cremation o fasen blong bonem ded man.

Town Clerk blong Port Vila Municipal Council, Peter Sakita, i talem se tintink ia i kam nomo afta long yus blong niufala cemetry long Eratap, Efate from i had blong faenem ol graon long futja.

Hemi talem se niufala ples blong stat berem ol ded man long Eratap long nekis yia hemi 14 hekta nomo.

Mbe Jif Wemal Tuwo Vanu, Wille Grey Plasua, i talem se i kat wei blong helpem Port Vila Municipal Council mbe tinktink blong bonem ded man bae hemi kam laswan.

“I save kat ol akrimen bitwin ol Jif blong Efate wetem ol Jif blong ol nara provins long town blong oli toktok folem kastom fasen mo aloketem wan graon blong oli save yusum,” Jif Wemal Tuwo Vanu, Wille Grey Plasua.

“Save mekem exampol long Eton, Jif blong Tafea i save toktok wetem Jif blong Eton blong alaoem wan graon blong berem famili blong Tafea, mo might oli pem wan rent long pipol blong Eton.

“Hemia sam tinktink we yumi save wok lem mo mi askem ol jif raon long Vanuatu blong mas leko ol raorao blong graon from yumi stap long nid.

“Man Vanuatu hemi kat tintktink blong oltaem sherem sori wetem wan love wan we i ded wetem ful bodi, mo mi no tink bae hemi filim gud blong wajem famili blong hem oli bonem hem.

“Mi sek tumas blong harem tinktink ia se yumi stap kat plan blong bonem ol famili blong yumi long futja.”

Jif Wemal Tuwo Vanu, Willie Grey Plasua, we i lukaotem ol othoriti blong kastom mo kalja long Vanuatu, i talem se hemi nosave alaoem wan man Vanuatu i bon from hemi kat value.

“Mama loa blong Vanuatu i talem se kaontri i bilt long christian principal mo blong bonem wan man, hemi olsem stap bonem wan impoten value.

“Mo blong plan ia i hapen, i mas kat moa awarenes long hem from mi save se plante man tu i akensem tinktink ia.”

Malvatumauri Council blong ol Jif i askem Port Vila Municipal Council blong wok tuketa wetem olgeta mo Kavman blong save faenem ol we.

Wan lokol we i no wantem talem nem blong hem, i talem se Vanuatu i mas stat blong tinktink blong introdusum fasen blong bonem ded man from tete i nomo kat graon blong berem ol ded man.

“Yumi stap luk hao Port Vila Municipal Council i tekem longtaem blong faenem wan niu graon blong berem ol ded man long Port Vila, folem isu blong spes naoia long Port Vila Cemetry,” hemi talem.

“I gud ol pipol we oli kat graon long ol aelan taem oli ded, oli mas flyem bodi i kobak nomo long aelan from mi harem tu se Port Vila Municipal Council bae i dabolem praes blong berem ded man long niufala graveyard long nekis yia long Eratap.

“Hemia bae i moa sas.”

Vanuatu Christian Council i bin tok akensem fasen ia blong bonem ded man from Bible i talem se taem wan man i fom long graon mo taem hemi ded hemi kobak long graon.

Town Clerk, Mr Sakita i talem se naoia i stap long disisen blong wan wan famili blong berem ol love wan long niufala site long Eratap.

“Ol graon we yumi  pem hemi blong berem ol ded man mo hemi blong State,” Mr Sakita i talem.

“Council i no stap long posisen blong talem long wan famili se yufala blong aelan, ko berem love wan blong yufala long aelan.

“Yumi mas save se mifala i fanem i had blong faenem graon blong niu ples blong cemetry, plante ples we mifala i faenem i no fitim kriteria blong kam wan cemetry.

“Yumi stap lukluk blong taem graon blong Eratap i vinis, yumi putum wan masin long cemetry blong save bonem ol ded man.

“I nomo kat ples, ol spes we yumi faenem i mas kat wota akses lem.”

Mr Sakita i askem ol othoriti blong kam wetem ol tinktink sapos oli akensem tinktink blong bonem ol man taem oli ded.