Malvatumauri i konsen long ol rabis post long fesbuk

Chief Executiv Ofisa blong Malvatumauri Council blong ol jif, i talem se ol pipol i mas stop blong putum problem blong olketa long fesbuk, from i no soem kalja mo kastom blong man Vanuatu.

Jean Pierre Tom i talem se motto blong Vanuatu i talem se, Long God Yumi stanap, mo taem ol fasin ia i stap hapen, hemi no stret nomo from i kat stret ples blong ko solvem long hem wetem olketa jif.

Hemi talem se, Mama loa blong yumi we i talem se Melanesian value nao hemi foundesen blong kaontri blong yumi.

“Mo sapos yumi ol pipol i no tek not long ol toktok ia, mo no folem toktok blong fes leit Prime Minister blong Vanuatu, Father Walter Lini  we i talem se, respect hemi honorable, bae long nekis ten kasem 15 yia, bae yumi no sapraes se, kastom mo kalja link we yumi  kat wetem ol famili olsem anti, ankel, mama o apu bae i nomo kat respek long hem,” Mr Tom i talem.

“Taem we yumi putum aot ol problem blong yumi i ko long fesbuk, yumi mas tinktink se hemi stret o no.

“Yumi mas putum ol post we yumi bilivem se hemi benifitim nasen ia Vanuatu, olsem national interest blong everi pipol.”

Operation ofisa blong Vanuatu National Computer Emergency Response(CERT ) i talem se, hemi taem Vanuatu i kat ol loa blong dil wetem ol rabis post long social media.

Kensly Joses i talem se, wan long ol loa we kavman i stap wok long hem naioa wetem ol patna blong hem, hemi blong hopefuli tebolem mo pasem long Palamen, loa blong cyber crime bill.

Hemi talem se hemia i blong i kaedem ol citizen taem oli stap usum internet.

“Bill ia, hemi stap yet long steij blong review mo afta long review bae i kat ol awareness wok i hapen blong i save pas long Palamen,” Mr Joses i talem.

Milroy Cainton, wan social media user, we i lukoatem Vanuatu Dialogue live mo Tek Tok i talem se, kavman tru long CERT Vanuatu i nid blong enfosem ol loa blong online quik taem.

Hemi talem se, hao nao pa mifala i putum ol criteria blong talem se fesbuk post ia i gud o hemi nogud o hemi mas delet mo hemia i had mo hemi nidim plante tinktink raon long hem.

“Ol otoriti i mas wok blong kipim internet i sef, mo sapos ol kaen isu blong post i kam antap moa, bae yumi stap experiencem ol fasin we ol man oli kilim tet olketa wan, oli komitim ol crime mo ol nara social isu bae i happen, sapos yumi no enfosem loa blong internet ariap,” Mr Cainton i talem.

Julian Ligo, we hemi ranem popula pej blong Yumi toktok stret News mo kat plante folowa, i talem se i kat two grup blong Yumi toktok stret long Vanuatu.

Hemi talem se, wan long tufala grup ia, hemi stap anda long grup we hemi lidim mo narawan hemi stap alaowem ol pipol i postem ol rabis foto mo video we i ko akensem standard blong komuniti.

“Long Yumi toktok stret news, bae mifala se, sapos yu wantem mekem ol rabis post olsem, yu mas tinkbaot se hemi gud o no, “ Mr Ligo i talem.

“Ol pipol i mas save se mifala i no ol wan wan grup mbe ol bisnis grup.

“Mo mi luk plante pipol tete i wantem kriatem ol grup, yu mas save  fastaem wanem yu stap mekem wanem, yu mas understanem ol wok blong fesbuk, mo yu mekem long wan we we yu save kontrolem.”

Yumi toktok stret news i operate online blong 11 yia nao, mo everi bisnis blong Mr Ligo i stap online nomo.

Jeffrey Garae, Consultant blong CERT Vanuatu i talem se, oli stap wok wetem ol patna olsem Vanuatu Police Force, Ofis blong Government Chief Information Officer mo Vanuatu Internet Governance forum blong save dil wetem ol isu ia, blong mas kat loa blong Internet long Vanuatu.

 

(Visited 45 times, 1 visits today)

About The Author

You might be interested in