Mama i no lus hop

Wan mama we pikinini blong hem i kasem COVID i kol blong no fraet mbe lukluk long Papa God.

Estella Jimmy i talem Long VBTC Nius se hemi no lus hop from help i kam long Bigman.

Mrs Jimmy i no kasem COVID mbe hemi advaes blong folem boy hem i ko long Korman isolation(Port Vila) kasem taem hemi oraet.

Taem hemi wet, hemi ko hed blong pray mo drink warm wota wetem lemon mo ginger.

“From kaontri blong yumi, yumi spendem moa tim blong prea i mekem se pawa blong prea i strong long kaontri,” Mrs Jimmy i talem.

“Long saed blong pikinini blong mi we mitufala i stap long Thursday kasm naoia, hemi no sik. Pikinini blong mi hemi oraet nomo. Mo sapos wan nara pikinini we hemi kasem COVID, ol parents i no mas fraet mbe tekem hem i ko long kwarentin.

“Mi wantem talem olsem ia se hop blong yumi hemi wan man nomo. Mo oltaem bae hemi protektem yumi. From yumi bilivim blad blong Jesus, ded blong hem so hemi defeatem evri samting so ples ia nao mi stanap long hem se bae mitufala i heal.”

Acting Director blong Public Health, Dr Jenny Stevens i bin talem se ol bigman nao oli stap long hae risk blong sik bigwan long COVID.

“Ol pikinini even oli save muv olbaot, i isi blong kasem COVID mbe immune system blong olgeta i oraet blong taem naoia,” Dr Stevens i talem.

“Wanem we Ministry blong Health i wantem naoia i blong ajivim wan gud kavarej bifo yumi save stikim ol pikinini blong yumi. Ministry blong Health i stap lukluk blong tekem stik meresin blong ol pikinini.”

Hemi talem se i kat tu pikinini i stap long isolation long Korman.

Mrs Jimmy i talem se bae tufala i hop blong kamaot long wik ia.

 

 

 

(Visited 102 times, 1 visits today)

About The Author

You might be interested in