Friday, March 29, 2024
26.8 C
Port-Vila
Friday, March 29, 2024
More

    Mane blong helpem ekonomi long disasta

    Stimulus pakej hem i helpem ekonomi blong Vanuatu blong stap gro bakeken long wan rate blong 0.6 pecen.

    Praem Minista Bob Loughman i talemaot long Palamen sitting yestedei se wetem kwik help we kavman hem i kivim long saed blong stimulus pakej blong impruvum ekonomi long impak blong COVID-19 mo Saeklon Harold, ekonomi blong Vanuatu i stat blong gro bakeken long wan rate blong 0.6 pecen blong Gross Domestic Prodak (GDP).

    Prime Minista, Bob Loughman, i talem toktok ia insaed long Palamen blong respon long toktok blong Hed blong State taem hemi askem blong namba 12 legislature i lukluk long ol wei blong groem bak ekonomi we COVID-19 disasta i afektem bigwan.

    Hem i talem se stimulus pakej hemi blong leftemap ekonomi blong Vanuatu mo sapotem ol lokol blong kat gudfala laef long disasta.

    Mr Loughman i talem se tufala disasta blong COVID-19 mo Saeklon Harold i kivim had taem long ekonomi blong Vanuatu blong gro. Tufala disasta ia i mekem se ekonomi blong kaontri i stap gro nomo long wan rate blong 1.1 pecen blong Gross Domestic Prodak (GDP).

    “Anda long COVID-19 stimulus pakej, gavman i plan blong putum in VT5.9 billion long ekonomi blong yumi olsem wan shot mo long term respon long crisis blong COVID-19,” Praem Minista Loughman i talem.

    Hed blong Gavman i pointemaot se ol key pat blong stimulus pakej ia hem i Employment Stabilization Peimen we hem i wan amaon blong VT 1.1 billion. Mo insaed long amaon ia gavman i kivim VT30,000 long olgeta emploia blong kipim ol wokman blong olketa i stap long pay roll mo helpem bisnis sekta.

    Narafala pat blong stimulus pakej hem i blong helpem ol Smol mo Medium Enterprise wetem wan amaon blong VT 400 million.

    Mo wan nara pat blong pakej ia tu hem i Tuition Fee Exempsen, Vanuatu Kavman hem i putum in wan amaon blong VT600 million, blong sapotem ol peren long pablik mo praevet skul. Wan pikinini hem i entaetol long wan amaon blong VT42,000 we hem i tution fee blong hem. Mo mani ia i ko daerek long ol skul.

    Narafala pat blong pakej ia hem i Kommoditi Sapot Grant we kavman hem i kivim long wan amaon blong VT 300 million.

    “Yumi no foketem olketa fama we oli fokas blong groem ol commodity olsem kava, cocoa, coffee mo kokonas, stimulus pakej ia i includum olketa tu,” Mr Loughman i talem.

    Hem i talem se nara pat blong stimulus pakej ia tu hem i Shipping Sapot Grant we hem i wan amaon blong VT 100 million. Gran ia hem i blong helpem ol ona blong ol ship wetem ol citizen blong yumi blong karem produis long ol aelan, i kam long ol bigfala maket senta.

    Praem Minista Loughman i talem tu wan nara pat blong stimulus pakej ia hemi Tax Relief long wan amaon blong VT 796 million. Hem ia i blong sapotem tax mane olsem rod tax, cancellations, rent tax cancellation, wok permit, fi cancellation mo residen permit.

    Mo wan nara pat blong pakej ia hem i Recovery mo Reconstraksen program, long wan amaon blong VT 3 billion.

    “Program ia hemi pat blong medium mo long term strategi we bae yumi finisim long en blong June 2020 mo rolem aot long kaontri blong yumi,” hem i talem.

    Mr Loughman i talem se stimulus pakej bae hem i createm wan bigfala win long economy blong Vanuatu.”

    Opposition i talem se Economic stimulus pakej i posibol nomo through long Financial reserve we foma Kavman i bildimap aot long Citizenship program.

    Lida blong Opposition, Ralph Regenvanu i talem se kavman i nid blong step in blong givhan long ol pipol olsem mama mo papa blong olgeta.

    Hemi talem se, “Vanuatu i stap long wan ekonomik crisis naoia, ekonomi i stap go daon bikwan finis mo bai i kontinu blong ko daon kasem situasen we yumi stap long hem naoia i finis.”

    Mr Regenvanu i talem se ol pipol oli stap safa from oli lusum wok, fulap bisnis oli klos mo ol revenue blong kavman kolosap oli nomo gat.

    Hemi kontinu blong talem se hemia i minim se kavman i mas controlem expense blong hem mo mekem sua se i implementem wan strong lidasip blong protektem mo helpem ekonomi i stap long wan stret level.

    Letest

    Sport

    More article

    • https://radio.vbtc.vu/radiovanuatu
    • Radio Vanuatu
    • Ol Radio Stesen
    • https://radio.vbtc.vu/paradisefm
    • Paradise FM
    • Ol Radio Stesen
    • https://radio.vbtc.vu/femmefm
    • Femme Pawa
    • Ol Radio Stesen