Mani blong COVID vaccine serious efek

Council blong ol Minista i apruvum VT120 million blong helpem ol pipol we oli sik bigwan long COVID stik meresin.

Anaonsmen ia Minista blong Health, Honoroble Silas Bule i talemaot long wik ia.

Minista Bule i talem se mani ia bai i ko blong sapotem tritmen blong ol sik man we oli kasem ol serious saet efect blong vaccine olsem blood clot o blood i nomo ron gud long bodi.

Hemi talem se espeseli ol pipol we Vanuatu i no save treatem olgeta long Vila Central Hospital mo i rikwarem moa medical tritmen long ovasi.

“Mani ia bambae hemi akses nomo sapos wan man i sik bigwan long stik meresin blong COVID, “Minista Bule i talem aot.

Minista Bule i talem se taem i nosave tritmen long Vanuatu, mani ia bae oli transferem hem i ko ovasi.

“Mani we i stap bae hemi yus long kaverem ap medical evacuation flaet, sapos i nid, hospitol bill mo daily alowens, acomodation, kwarentin mo sapotem man we i folem sik man,”Minista Bule i talem.

Minista Bule i talem se ol nomol saed efek olsem hed i soa, fever, traot afta long stik hemi ol nomol mo mani ia hemi no aloket from.

Anda, long indemnity paper we palamen i pasem long eli wik ia hemi blong eni compensation blong vaccine bai i kam tru long COVAX faciliti.

Mbe wetem longfala proses we COVAX i gat, kavman i agri blong VT120 million ia hemi blong yus long eni emergency long saed efek blong tufala vaccine we Vanuatu i yusum.

Naoia, Ministry blong Helt hemi rikodem tu pipol we tufala i sik bigwan afta we tufala i bin tekem stik blong COVID.

Long Vanuatu COVID-19 situation ripot namba 56 i statem se fes patien hemi sik long manis blong August afta we hemi risivim stik meresin mo oli transferem hem i ko long New Caledonia blong tekem moa tritmen mbe naoia hemi oraet vinis.

Nara sik man hemi sik long October mo hemi karem tritmen nomo long Vila Central Hospital.

Mo patient ia hemi rispon gud long ol medical treatment mo stap long stable condition long Vila Central Hospital.

Sins June yia ia, Ministry blong Health i rikodem 405 saed efek blong vaccine mo tu nomo we i sik bigwan afta we tufala i tekem stik.

(Visited 56 times, 1 visits today)

About The Author

You might be interested in