Mani blong kontenem fes COVID-19 kes

Council blong ol Minista i aloketem wan amaon blong moa long VT200 million blong ol othoriti i yusum blong kontenem fes kes blong COVID-19.

Prime Minister, Bob Loughman, i talem se, “Hem ia i soem efot blong yumi, blong yumi helpem ol ofisial blong yumi mo ol franline ofisa blong yumi blong kontenem kes ia.”

Hem i talem tankiu long tufala MP blong Efate from aelan ia hem i save akomodetem ol lokol mo residen we oli kam ovasi mo ko tru long kwarentin long aelan ia.

Prime Minister Loughman i talem se everi offshore aelan blong Efate oli pat blong Efate mo ol pipol long ol aelan ia, i sud muv frili kasem taem i gat advaes blong stopem muvmen blong ol pipol bitwin Efate mo ol offshore aelan ia. Council blong ol Minista i mekem rekomendasen blong stopem muvmen blong ol pipol in mo aot Efate kasem taem kontak tracing mo precausen test i en.

“Yumi everi wan i mas mekem sua se yumi helpem ol ofisiol blong yumi blong helpem isu we i stap.”

Memba blong Palamen blong Efate Rural, Guillion William, i askem sapos i save kat klia infomesen i kamaot long lok daon blong travel insaed long Efate.

Hem i talem se i kat plante pipol blong Efate we oli stap travel i kam long wok everi dei long Port Vila town.

Prime Minister Loughman i talem se Council blong ol Minister i disaed se sapos man i aot long aelan blong Efate bambae hem i ko stap mo no kambak kasem taem oli karemaot lokdaon.

Prime Minister Loughman i talem se lokdaon bae i nosave tekem longtaem, bae i stap kasem kontak tracing blong kes ia i komplit.

“Bae yumi tracem olketa ia fastaem mo sapos oli negativ, yumi fri. Yumi no lokem daon ol skul yet,” Prime Minister Loughman i talem.

Hem i talem se, “Taem we system blong yumi i bin ditektem se i kat wan pasenja i kam long hae risk, ol ofisiol i stat aplaem protocol ia vinis long Auckland i kam.”

“Long plane, oli alaoem hem wan i kamaot fastaem, hemi ko long wan bus, i kat wan draeva i draevem hem mo i ko long kwarentin ples we hemi stap long hem,” hemi talem.

Hem i talem se naoia bae oli muvum patient ia i ko long Vila Central Hospital long ol rum blong ol COVID-19 positive kes.

Memba blong Palamen blong Luganville, Matai Seremaiah, i aknolejem Prime Minister Loughman long toktok blong hem.

Prime Minista Loughman i talem se “Nius ia i kivim kamfot long kaontri se ol protokol we yumi aplaem, yumi detektem mo yumi plan olsem wanem blong kontenem.”

Hem i askem ol pipol blong kontinu blong washem han mo mentenem social distancing.

Hem i talem se ol pipol i no mas panik mbe prea from nation blong i stap sef oltaem.

I bin kat 153 pipol oli bin kam long flaet blong Auckland, New Zealand long 4 November mo wan i tes positiv.

(Visited 900 times, 1 visits today)

About The Author

You might be interested in