Maritime i putum aot strik plan-COVID-19

Vanuatu Maritime Regulator i isuem wan Standard Operating Prosija blong ol ship owna i komplae blong save kontinu long seves.

Acting Regulator blong Maritime Regulator, Kembro Manderson, i talemaot tete long COVID-19 health tok.

“Fes samting we mifala i mekem sapos ol ship i wantem aot, oli crew oli mas stap long ship blong 48 haoa(tu dei) bifo oli ko long ol aelan,” Mr Manderson i talem.

“Taem ship i kasem ol nara aelan, bae ol crew memba i unloadem ol cargo mo putum long wharf. Ol crew i stap nomo long ship mo alaoem ol client blong kam tekem aot cargo.

“Ol man we oli tekem parcel blong kam long Port Vila, oli tekem i kam putum long wharf nomo, ol crew oli lodem oli kam kasem Vila mo oli nosave unlaodem long semak dei. Afta long 48 haoa bae oli jes unlaodem long ship.

“Sapos wan ship i wanetm aot, hemi mas aplae i kam long Ofis blong Maritime Regulator; i submitim Standard Operating Prosija, ten mifala i fowodem i ko long Ministry blong Health o health advisory, hemi apruvum ten hemi save depart.”

Mr Manderson i talem se long wik ia oli trialem aot ol fuel.

“Fes ship we hemi aot tete long Vila hemi Tauraken 3 blong ko long Tanna hemi fuel nomo,” Mr Manro i talem.

“Long Tuesday ating bae i kat wan tag bot we i stap toem badge ia bae i ko kasem Tanna tu from fuel. Yumi stap trialem aot fuel sapos yu luk se ol man oli wok gud wetem ten yumi save extend i ko long cargo olsem we Director blong Ports mo Harbour i talem. Bae yumi jusum ol aelan ia, ating wan o tu ship nomo i visitim wan pot nomo blong ol provins.

“Olsem sapos i ko long Malekula, ating bae i ko long Litzlitz nomo o Lamap.

“Pa mi putum wan exampol long Tauraken 3 we i kasem Malekula long wiken, sam hao Tanna hemi shot long Fuel mekem se yumi mekem hemi stap wan dei Vila bifo hemi save ko long Tanna.”

Samuel Taffo, VBTC Ripota long Tanna, i talem se COVID-19 tasfos i strik taem ship i kasem Tanna long wik ia.

Hemi talem se 2000 lita blong fuel i kasem Tanna.

 

 

 

 

(Visited 519 times, 1 visits today)

About The Author

You might be interested in