Market waste projek

Environment Dipatmen i wok wetem ol lokol prodiusa long Port Vila blong mekem ol prodak aot long organic waste.

Organic waste o toti blong kakai, hemi bigwan bitim eni narafala kaen toti mo hemi gudfala samting blong mekem graon i rij mo envaeromen.

Dipatmen blong Environment hemi tekem step ia blong patna wetem Port Vila City Council blong manejem toti blong kakai long ol maket long taon.

Director blong Environment, Touasi Tiwok, i tokbaot impotens blong patnasip se organic waste o toti blong kakai, hemi bigwan bitim eni narafala kaen toti mo hemi gudfala samting blong mekem graon i rij mo environmen.

Hemi talem se wanem we dipatmen i stap karemaot hemi anda long Waste Management Act.

“Toti blong kakai hemi wan long ol bigfala toti, aot long evri kaen toti long Buffa Landfill (Etas); Wan long ol rod blong solvem problem ya, hemi wea nao yumi stap produsum toti blong kakai, mo olsem wanem yumi save manejem. Wanem yumi traem blong mekem i blong manejem toti blong kakai wetem projek ya. Mo bai mifala i luk se proses ia i produsum wan prodak we i no spoilem environmen,” Ms Tiwok i talem.

Port Vila City Council hemi transpotem ol toti blong kakai olsem dry kokonat, skin blong kokonat mo greens i ko storem long Seaside Market Haus eria we bisnis i stap operet long hem.

“Fes prodak hemi liquid fertilizer we i test long New Zealand; Hemi help blong produsum moa kakai, i mekem plan i helti,” Michel Raikatalau, Owna blong V-Organic i talemaot.

“I gat blong seedling long saed blong plan mo mulching. I gat jakol tu we yu save yusum fo brikit nomo blong kuk. Hemi gud from hemi save laet blong wan haoa.

Hemi talem tu V-Organic i stap traem blong mekem ol jakol brikit ya blong laet long bitim wan haoa.

Mr Raikatalau hemi presentem projek mo ol prodak blong hem long Ambasada European Union mo Environment Dipatmen.

Ambassdor blong European Union, Sushiro Seam i soem big intres long projek ya.

“Mi laekem tumas projek yam mo blong pat long hem, from hemi wan grasrut projek,” Mr Seam i talem.

“Hemi stat smol nomo long komuniti we i mekem se ol mama oli save gat janis blong gat wan wok mo karem smol vatu long hem.

“Hemi wan projek we oli manejem gud mo hemi wanem we European Union i wantem,” Mr Seam i talem.

Ambassador Seam i gohed blong talem se European Union bae i kontinu blong groem woking patnasip mo semtaem invest long Vanuatu.

By Tiffany Baldwin.

 

 

(Visited 71 times, 1 visits today)

About The Author

You might be interested in