Maskelyne canoe reis blong trenem pikinini

Maskelyne canoe reis festivol i open long Malekula long wik ia blong educatem ol yang pipol long yus blong canoe.

Jeaman blong Canoe reis festivol, Kalo Nathaniel,  i talem se mein tinktink blong hem i blong helpem mo lanem ol yangfala long hao nao ol olfala blong bifo oli mekem canoe mo hao nao oli yusum.

Hemi talem se ol traditional tinktink mo ol wei blong mekem canoe naoia long ol aelan raon long Vanuatu i stap lus sloslo.

“Festival ia hemi olsem wan education program blong tijim ol pikinini long hao oli save katem mo bildim wan canoe,” Mr Nathaniel i talem.

“Mo hao ol pikinini i save paddle long wan canoe.”

Mr Nathaniel i talem se blong karem bak olgeta tinktink ia, ol pipol blong Maskelyne i statem wan festival wei oli singaotem Maskelyne canoe race festival. Hemi talem se mein tinktink ia i bin stat long yia 2017 we i karem tugeta ol pipol long trifala vilij long aelan blong Maskelyne.

Chief Executiv Ofisa blong Vanuatu Tourism Ofis, Adela Aru, i talem se kaen tinktink blong festivol olsem i save helpem ol yangfala blong kat sam save long hao oli yusum canoe mo help promotem lokol tourism long kaontri.

Hemi talem se boda i klos from COVID-19, pipol i mas stat blong sapotem domestic tourism.

Mrs Aru i talem se tourism ofis i statem kampaign blong domestic tourism long yia 2020 blong sapotem ol kaen festivol mo even olsem.

Long opening i kat wan canoe sail parade we i hapen, we evri sailor mo ol delegates oli ko long maskelyne oli sail aot long wan smol pasis i ko long ples we even i stap long hem.

Yia ia hemi makem namba 5 edition blong festival ia, long Monday wik ia, i kat opening blong festival we komuniti blong Peskarus vilij nao i hostem.

Mein aktiviti canoe reis i jes stat long tete Tuesday mo bambae i vinis long Wednesday wik ia.