Merelava i askem gudfala ship pasis

Merelava aelan i askem kavman blong mekem gud pasis blong ol ship blong i isi mo sef long pipol.

Mike Albie long Aota vilij long Saot East blong Merelava, i talem long VBTC Nius se aelan ia hemi hill mo clif mo pipol i faenem i had blong transpotem ol cargo aot long ol smol bot from i nokat wan propa landing pasis.

“Evri lida blong yumi we i stap kam long Merelava o even eni pipol we i kam i luk klia pitja blong pasis ia i stap,” Mr Albie i talemaot.

“Hemi nid blong yumi bildim gud long sefti blong man long shoa mo olgeta we oli kam long ol bot wetem ol cargo.

“From samtaem yumi damejem ol pasel mekem se taem i ko long ol bisnis haos ol kastoma i kam blong pem mbe i no stap long ol kwaliti.

“Sam long ol goods ia oli wetwet mekem se i nosave stap longtaem.”

Presiden blong Torba Provinsiol Kavman Kaonsel, Edmond Sovan, i talem se kaonsel i awea long situasen we ol pipol blong Merelava i stap fesem longtaem i kam.

Mr Sovan i talem se oli bin letem kavman i save long hem mbe i nokat eni aksen i hapen.

“Long 2017, kavman i endosem blong yumi putum landing steij long trifala aelan long Banks Grup ia we hemi Merelava, Mota mo Ureparapara from ol pipol i nokat gudfala akses long pasis blong ship,” Mr Sovan i talem.

“Long Merelava aelan i kat ship pases long Aota, Tesmet mo Lekweal mo evri ship we oli kam oli pas tru long ol pasis ia nao.

“So wanem konsen komuniti i putum hemi tru from oli rili fesem espeseli ol pipol wetem disabiliti.

Mr Sovan i talem se Merelavalava aelan hemi difren long ol nara aelan we bot i ko shoa gud long hem.

Hemi askem kavman blong provaedem developmen long ol aelan blong Torba semak long ol nara aelan blong Vanuatu.

Pablik Relation Ofisa blong Ministry blong Pablic Utilities mo Infrastructure, Antoine Malsungai, i talem se kavman i plan blong bildim ol projek jetty long ol aelan we i nokat gudfala pasis blong bot.

Mbe hemi nosave talem wen bae i stat.

Mr Albie i talem se oli plis long ol otoriti blong luksave nid we oli kat.

Ol ship i ko long Merelava wan taem long wan manis mo ol smol bot i transpotem ol cargo i ko long ol eria blong pasis.

Pasis blong Tegua, Metoma mo Toga long Torres grup tu i nokat ol gudfala landing steij long hem.

Merelava i kat faev vilij wetem tri primary skul; tu skul hemi english mo nara wan hemi franis wetem ova 400 pipol long aelan ia.

Merelava i stap long 50 kilomita east blong Gaua aelan.

 

 

(Visited 1093 times, 1 visits today)

About The Author

You might be interested in