Merelava i wantem bank seves

Merelava long Banks Grup i askem seves blong komisol Bank.

Wan papa i talem se ol pipol i mas travel longfala distens blong kasem Gaua blong mekem banking.

Lokol ia, Mika Albie, we woman blong hemi i tij long wan Primary skul, i talem se taem paydei oli mas travel tri haoa i ko long Gaua.

Mr Albie i talem se i nokat bot mo trak long Merelava.

“Blong jatarem wan bot i kam long Gaua,pik ap ol lokol blong ko long Gaua mekem banking mo kambak drop off hemi ova VT90,000,”Mr Albie i talem.

“Mo hemia i sas tumas.

“Mifala i plis long ol otoriti blong bank blong setem ap seves blong bank long plesia blong mekem laef i isi lelbet. Evri pay dei, ol tija mo ol nes o even ol lokol bisnisman i mas travel mo spendem mani olsem mo i no fea.

Mr Albie i talem se i kat tri Primary skul long Merelava. Wan English mo French skul we ol tija i tij long hem.

Hemi talem se i kat wan health dispensary tu we wan health wokman i stap wok long hem.

“Bot fea i sas tumas,” Mr Albie i talem.

VBTC Nius i traem blong kasem ol otoriti long rurol bank mbe oli no kamaot klia yet wetem wan ansa.

Mr Albie i askem ol otoriti blong tekem hem ia wan prioriti blong putum seves ia i ko long grasrot.

I kat ova 400 pipol long aelan ia.

Merelava i stap long 50 kilomita east blong Gaua aelan.