MKV Urata daon long solwota

Afta tri wik long slipway, MKV Urata i draon long midel blong Erromango mo Efate araon long 10-11o’klok long Sunday naet.

Owna blong ship, Memba blong Palemen blong Tongoa, John Amos i talem long VBTC Nius tete se araon VT10-15 million i spend long slipway blong ship mo hemi nosave wanem i hapen blong mekem solwota i fulap long ship mbe hemi glad se 12 crew i sef wetem wan ofisa blong Wash cluster.

I kat 3800 carton blong wota, 5 tank blong 10,000 lita wetem sam pipe.

“Insiden we i bin hapen long wiken, yumi evri wan yumi nosave reason blong hem; Tri wik i pas, LCMKV hemi jes kam daon long slipwei long Santo. Yumi spendem samples VT10 to 15 million blong riperem ship,” Mr Amos i talem.

“Sapos hemi no bin ko long slipwei ale hemi draon bae hemi kwestenem ia nao mbe ship i ko long slipwei wetem ol niu plet,haf plet blong ship i stap ia.

“Hemi kam fes run mo seken run nao hemi ko blong ko long Tafea. Fes wan hemi bin ko long Tanna mo nambatu raon nao blong hemi ko, ol crew oli jes sek nomo wota i fulum ap ship mo kasem 5-6 miniti, ship i bin capsaed. So yumi nosave gud kos blong hem mo mi jes arem nogud nomo blong bilivim se ship i draon wetem bigfala investmen ia we yumi bin spend long hem mbe plan hemi blong Bigman sapos sam man i kat ol rabis tinktink o wanem yumi nosave.

“Papa God i gud i mekem oli jamp long smol bot blong mi oli ron kasem long Erakor Jetty Wharf, ples we mifala i jes ko pikim ap olgeta long hem.

“I kat 12 crew inkludum wan ofisa blong National Disaster Management Ofis.”

“Sapos sam man oli stap talem se hemi ovaload no hemi no ovalaod, mi bin ko jekem ship long Sunday bifo hemi aot; Laoding laen hemi abaot 10cm we i stap,”

“So blong man i toktok olbaot i gud blong yumi karem stret infomesen bifo ko long fesbuk blong rabisim man. Mbe pa mi talem olsem se moto blong mi, mi neva give ap, yestete hemi pas, tete hemi wan niu dei so God i kat plan blong evri samting so bae yumi no sapraes blong luk wan mo niu ship blong sevesem yumi ol lokol long Not kasem long Saot.”

Wan staff blong Water Cluster wetem 12 Crew oli manej blong survive mo ko shoa long Erakor long Monday.

Acting Director General blong Land mo Natural Resources, we hemi stap olsem Lead blong Water Cluster, Erickson Sammy i talem se oli loadem ship long Saturday mo Sunday 3.30 Pm Ship il ego Port Vila long blong ko long Tanna

Mr Sammy i talem se ol Material we oli lusum hemi ol Material blong Atilons Bay Water System we hemi blong vinisim wok blong pipol i save kat gudfala wota system.

“I kat tu ol wota tank mo nara wota material blong ko upgradem wota system long Tanna. Ova 3000 carton blong ol wota blong ko long Aniwa folem shotej long sef wota long aelan blong Aniwa,” Mr Sammy i talem.

“Hemi stil anda long diskasen blong wanem bae i hapen next.”

Mr Amos i kat LC Urata ship feswan we i bin draon long solwota blong Malekula long 2018.

“Afta mi tekem hemia bakegen we LCMKV long 2 yia amas manis nomo; Ol tink we oli lus long ship, yumi kat kondak wetem olgeta long Disaster Ofis mo bae i kat moa arenjmen.

Mr Amos i enkarejem ol smol mo bigfala bisnis owna blong taem wanem i pas, leko i stap bihaen from bae i neva save kambak.

“Luk long foret mo wok long goal blong yu long front blong yu,”

Maritime Affairs i talem se investigation i stap ko hed mo bae oli kamaot klia long hem taem i en.

Mo askem ol ship blong tekem kea taem oli pas long eria we ship i draon long hem folem ol wota tank, olfala iron mo 30 foot kontena.

MKV Urata i bin stap sevesem pipol long Not kasem Saot.