Moa bebe i bon long Vila Hospital

Vila Central Hospital i stap luk 300 mama i bonem bebe long ol manis long March, April, May mo June.

Hemi konfemesen we Dr Boniface Damutalau, Dokta we i lukaotem ol mama we oli kat bel long Vila Central Hospital.

Dr Damutalau i talem long VBTC Nius se long experience we oli kasem, manis blong March, April, May mo June hemi ol manis we plante bebe i bon plante bitim ol nara manis long yia.

“Sapos hemi ko long ol bigfala taem olsem ol fo manis we mi bin talem ia, bae 20 ko kasem 40 bebe i bon long wan 24 haoa period,” Dr Damutalau i talem.

“Mo talem se hemia i bigwan tumas from bed spes mo ol staff tu i smol nomo. Yumi kat smol namba blong ol midwife staff nomo mo taem plante bebe oli bon, olgeta tu i ova stres mo yumi stil nidim plante nes, midwife mo dokta blong help wetem populasen we i stap gro.

Ova long 3000 bebe i bon long las yia 2021. Vila Central Hospital i rikodem 2930 bebe we oli bon stat long January kasem long Octoba. Long Novemba kasem Decemba i gat 262 bebe i bon.

Vila Central Hospital Maternity Wod i talem se namba i hemi bikwan bitim long yia 2020 we hemi ova long 2000 bebe nomo oli bin bon.

Dr Damutalau i talem se hae namba ia hemi ol nomol age blong mama nomo i stap bonem bebe.

Hemi talem se aot long bigfala namba ia ova long las tri yia ia, 10 per cen hemi ol teenage pregnancy.

“Naoia yumi luk plante mama we oli kam bonem bebe i ova 20 yia blong age,” Dr Damutalau i talem.

“Long Efate yumi mas save se ol mama i kam stap bonem bebe nomo long Vila Central Hospital mo Not Efate wetem ol offshoa aelan hemi long Saupia Health Center long Paunangisu vilij,” Dr Damutalau i talem.

“Populasen blong shefa i moa hae from hemi ples we plante pipol oli kam liv mo wok long town. Yumi kasem tu ol hae risk pregnancy we i minim se ol mama we oli kat problem mo faenem i had blong bonem bebe oli kam long ol provins sapos hospital long Santo i nosave tritem olgeta.

“Mo hemia nao namba ia i bigwan long las yia.”

Dr Damutalau i talem se i kat 28 bed nomo long Maternity Wod blong Vila Central Hospital.

“Sapos i kam long fo bisi manis ia mo 130 mama i bonem bebe long wan dei, hemia mifala i faenem i wan jalenj from sapos wan mama i deliva, bae hemi no mas aot long bed kasem 24 haoa,” Dr Damutalau i talem.

“So taem hemi stap rest afta we hemi bonem bebe, wan moa mama i kam in blong bonem bebe samtaem bae mifala i lukaotem wan nara spes samples long hospital o sapos mama ia i liv kolosap long Nambatu wan eria kolosap bae mifala i save letem mama ia i aot long 12 haoa nomo. Mo mama ia i save kambak tu o tri dei blong mifala i jekem hem sapos hemi oraet.

Dr Damutalau i talem se hemi moa gud blong lukaotem ol mama long hospital afta long deliva.

“Taem mifala i leko olgeta kwiktaem afta long deliva, mifala i advaesem olgeta se sapos oli stil luk plante blood yet, oli feva o titi i solap blong oli mas kambak from tritmen,” Dr Damutalau i talem.

Vila Central Hospital i rikodem stat long January 1 kasem 3, 30 bebe finis oli bon blong statem niufala yia ia.

Long Norsup Hospital long Malekula, long Januaty 1 kasem 5, 10 bebe i bon.

Dr Damutalau i talem se oltaem oli givim awenes blong famili planning long hao blong spesem ol pikinini taem ol mama i kat bel mo ko mekem ol visit.

 

 

(Visited 295 times, 1 visits today)

About The Author

You might be interested in