Moa flaet blong ol seasonal wokman

Dipatmen blong Labour i konfemem eight flaet blong flaem ol seasonal wokman i ko ovasea long January mo February.

Commissioner blong Labour, Murielle Metsan Meltenoven, i talem se ol flaet ia hemi blong tekem ol seasonal wokman blong Vanuatu i ko wok long ol fam blong Australia mo New Zealand.

Hemi talem se i talem se i kat posibiliti se bae i kat adisenol flaet aot long eight konfem flaet ia.

“Long saet blong proses blong ol jata flaet hemi risponsibiliti blong ol fama oli nikosiate direk wetem national airline blong yumi we hemi Air Vanuatu,” Mrs Meltenoven i talem.

“Mo taem yumi kat konfemesen blong flaet ia bae oli infomem ofis blong Civil Aviation mo i kam long mifala long dipatmen mo mifala bae i riwestem aprovol long komiti blong COVID-19.

“Mi wantem talem tu se ova long 500 wokman blong Recognised Seasonal Employer oli stap prosesem travel dokumen blong olgeta olsem polis clearance long wik ia.

“Hemia i folem riwest we New Zealand i bin askem Vanuatu Kavman blong provaedem 624 wokman i ko anda long scheme ia.”

Mrs Meltenoven i talem se fes grup blong olgeta Recognised Seasonal Employer wokman ia bae oli aot long fes jata flaet long namba 3 February.

Hemi talem se ol wokman we bae oli pat long Recognised Seasonal Employer hemi ol wokman we oli bin pat long scheme ia vinis moo li ol experience wokman folem riwest we ol fama oli bin askem.

Dipatmen blong Labour i talem se i gat 16 agent we ofis i bin apruvem nem blong olgeta blong rikruit anda long scheme ia.

I kat sam grup blong ol wokman we oli pat long Seasonal Workers Program long Australia oli bin aot vinis long eli yia ia.

 

 

 

 

 

(Visited 1256 times, 1 visits today)

About The Author

You might be interested in