Moa investikesen long MV Havatu

Ofis blong Maritime Regulator bae i mekem moa investikesen long ship Havatu taem hemi kasem Luganville.

Long wik ia ship ia i bin flaot long Ambae long eria blong Red Cliff wetem sam pasenja insaed.

Ofisa In-jaj long Ofis blong Maritime Regulator, Lloyd Fikiasi, i talem long VBTC Nius se wanem oli andastanem beis long ol maritime Regulator Ofisa long Santo se pump blong ship nao i nogud mekem se i nosave kulum enjin.

“Pump blong ship i brok daon mekem se enginia i mas satem daon enjin blong no mekem eni moa damej,”Mr Fikiasi i talem.

Long Wednesday moning tim blong Maritime Regulator long Santo wetem owna blong ship i bin sendem wan ship St Raphael we hemi blong semak owna nomo wetem wan pump. Oli kasem long Ambae, oli riperem pump ia mo MV Havatu i kontinu long seves blong hem i ko long Pentecost.

“Infomesen we yumi kasem se evri pasenja mo cargo oli oraet nomo. Mo yumi talem tankiu long rispon blong tim blong yumi long Santo mo owna blong ship.”

Wan social media post long wik ia, i kol blong kwik sapot from sins Wednesday moning, ol mama mo ol pikinini i stragol from sun i strong tumas mo wota i nomo kat.

Mr Fikiasi i talem sori long ol pasenja we oli bin travel long ship ia.

“Wan samting mifala long maritime i traem blong impruvum hemi sefti mo seves blong shipping industry,” Mr Fikiasi i talem.

“Hemia bae i tekem taem lelbet mbe wetem sapot blong Kavman we yumi kat naoia mifala i luk wan gudfala saen blong impruvum sekta ia.”

MV Havatu i beis long Luganville, Santo.