Moa Kavman revenui tan spending

Ministry blong Finance i talem se revenui blong Kavman i stil stap hae kompea long ol spending blong hem eventoh kaontri i ko tru long plante crises.

Director General blong Finance, August Letlet, i mekem toktok ia long Economic Recovery Post COVID-19/TC Harold Forum long Wednesday wik ia we oli okanaesem blong karem ol update infomesen long ol bisnis haus long hao oli stap prokres wetem stimulus package.

“Revenui hem i rafli 17.5 pesen blong Gross Domestic Product excludum ol diveloping patna mo sapos yumi tekem in ol diveloping patna hem i rafli 19.9 pesen blong Gross Domestic Product. Mo blong ol spending hem i rafli 14 pesen,” Direct General Letlet i talem.

Hem i talem se Kavman i gat sam kie economik mo fiscal taket we oli bin putum i stap blong folem long yia ia 2020.

“Wan long olgeta hem i tat reveniu bambae hem i araon 21 pesen blong GDP. So far yumi stap long 14 pesen so hem i no nogud,” hem i talem.

“Blong ol spending yumi bin lukluk se bambae hem i stap araon 21 pesen blong GDP mo hem ia hem i recurrent, i minim se hem i excludum ol fanding we ol diveloping patna oli stap provaedem.

“Yumi bin so far stap araon 14 pesen. So yumi gat wan Net lending position. Hem ia i minim se, i gat moa revenui tan ol spending.”

Ol praevet sekta olsem ol turism opereta, representatif blong pablik land transport, Association blong ol Hotel mo ol nara smol mo medium bisnis tu oli bin stap blong reisem konsen blong olgeta long forum ia.

Long wan sevei we Vanuatu Chamber blong Commerce mo Indastri i bin rilisim long 08 Julae, long saed blong Employment Stabilisation Pakej, i soem se majoriti blong ol bisnis we oli kwalifae from Employment Stabilisation Pakej oli no risivim peimen blong olgeta yet blong April, May mo June wetem sam we oli stap wet yet long peimen blong March.

Sevei ia i soem tu se majoriti blong ol binis haus i ridusum namba blong ol staff blong olgeta i ko daon long fo mo anda.

Sevei ia i soem tu se 38 pesen blong ol binis bae oli putumaot staff on leave witaot pei o benefit.

Vanuatu Chamber blong Commerce mo Industry i rikomendem long sevei ia, se i nid blong gat wan riviu long intenal proses blong mekem peimen blong mekem sua se ol bisnis i save kasem ol aotstanding peimen blong Employment Stabilization Package kwik taem.

Chief Executive Officer blong Vanuatu Chamber blong Commerce mo Industry, Astrid Bulekone, i reisem konsen blong hem folem pakej blong Gavman.

Ms Bulekone i talem se hemi wandem lukim Employment Stabilisation Pakej i kontinu kasem ol boda i open.

Hem i talem se sapos Kavman i no extendem Employment Stabilization Package, bambae 58 pesen blong ol binisi we chamber hem i bin seveim olgeta mbae oli putumaot ol staff blong olgeta.

Vanuatu Chamber blong Commerce mo Industry i talem tu se blong privet sekta i kipim ol wokman, hem i nidim sapot blong capitol investmen. Ol bisnis oli nidim akses long finance for exampol zero loans.

Chamber i talem se blong Kavman i invest long fiuja blong kaontri ia, hem i nid blong mekem wan investmen fund i available blong privet sekta, blong sapotem nekis generesen blong ol binis man mo woman Vanuatu.

Finance Department i notem daon ol komen we i bin reis long taem ia mo talem se bai oli lukluk long hem long hao oli save adresem.

(Visited 61 times, 1 visits today)

About The Author

You might be interested in