Moa mani i mas ko long yut program

Youth Empowerment Vanuatu i kol from inkris long yut budget blong Vanuatu.

Jeaman blong Youth Empowerment Vanuatu, Steve Kiel, i apil ia long opening blong wan komuniti senta long Erakor bridge, Efate long wiken.

Mr Kiel i talem se hemi taem kavman i putum moa vatu long Ministry blong ol Youth blong inkrisim moa aktiviti blong yut.

Hemi talem se Ministry blong Yut hemi wan long ol ministry we i kat wan low budget.

“Mi wantem mekem wan spesel apil i ko long Vanuatu kavman blong hemi arem; mi tink se hemi taem hemi lukluk plante ol yut blong Vanuatu sapos hemi nid blong kivim moa mani blong sapotem ministry blong ol yut,” Mr Kiel i talem.

“Sapos hemi inkrisim mo i kat moa aktiviti blong ol yut i involve long hem, mi tink se societi i save kro.

“Mo ol societi i sud jenis wetem ol yut we oli kam ol spesel pipol afta long faev kasem 10 yia olsem.

“Wan spesel apil i ko long Vanuatu kavman blong plis lukluk mo empowerem ol yut blong yumi from ples ia nao bae oli save kam ol gud lida long futja.”

Mr Kiel i talem se plante long ol yut, oli ol skul drop aot mo oli ko involve long smoke mo alcohol mo mekem ol problem

Prime Minista, Honoroble Bob Loughman, i talem se prioriti blong kavman i blong sapotem mo helpem ol yut long kaontri.

Hemi talem se kavman i no fogetem olgeta yut.

“VT 50million we kavman i kivim long  Vanuatu Christian Council long yia ia, hemi blong help trenem ol yut long jej blong no pat long ol doti fasin, “ Prime Minista Loughman i talem.

“Afta long jej, bae yumi sapotem ol jif mo yut.

“Ol komuniti i mas pat blong trenem ol yut tu; yumi mas kam wan mo unite blong leftemap wan wood we i hevi blong ajivim sakses.

“Mi akri wetem toktok blong Youth Empowerment Vanuatu se Correctional Center hemi no ples blong putum wan yut we yumi nomo save dil wetem o yumi taet lem.

“Ansa blong hem, hemi hao yumi krupum tuketa ol yut, trenem olgeta blong oli kat tinktink se oli mas kam ol gudfala yut.

“Yumi mas save se fomol education sekta blong yumi long kaontri i nosave sapotem evri yut long kaontri.

“Mbe taem wan pikinini i failem exam, hemia hemi no en blong rod blong kam wan strong hed boy o kel.

“Yangfala ia i mas explorem nara talent o skill blong hem blong hemi save kat wan gud laef long futja.”

Mr Kiel i askem ol yut blong kat rispek blong oli save kam wan gudfala Memba blong Palamen, wan pastor o wan nara lida long futja.

Yut Empowerment Vanuatu i stap sponsarem tu prisiona long prision haos naoia blong skul from loa blong kam lawyer afta long fo yia.

“Vanuatu Youth Empowerment i bin stat long wan taem we sam grup blong ol yangfala i drong long wan eria long Port Vila, ale oli bin brekem ol bottle blong drink long rod mo polis i bin kam,” Mr Kiel i talem.

“Taem ia nao mifala i disaed blong statem yut organisation blong talem se hemia i no en blong rod.

“From sapos yumi no mekem, hu bae i helpem ol yut.

“Yumi mas rij aot long ol nara yut we oli drop aot long ol skul we oli involve long smoke mo alcohol blong talem se hemia nao wei.

“Mo hemia nao yumi involvem olgeta long sports, bisnis, lidasip mo education.”

Prime Minista Loughman nao i openem niufala komuniti senta long Erakor bridge.

 

 

 

 

 

 

 

 

 

 

(Visited 266 times, 1 visits today)

About The Author

You might be interested in