Moa pipol i ko wok ovasi

Namba blong ol pipol we oli resaen long wok blong joinem Labour Mobility i inkris.

Commissioner blong Labour, Murielle Meltenoven i konfemem long VBTC Nius se moa pipol we oli wok finis long Kavman mo Private Sector i stap ko ovasi.

Hemi se even we program olsem Seasonal Workers Program hemi blong olgeta unskil woka, mbe naoia i gat ol kampani long Australia i nidim pipol we i gat ol skil blong mekem ol wok.

Mrs Meltenoven i talem se pipol i stap kwestenem wok blong Labour Dipatmen abaot situation blong shotej blong ol wokman long Vanuatu mbe hemia i nidim politikol wil blong dil wetem situation ia.

Hemi konfemem se bae hemi save afektem labor market long kaontri mbe i stap nao long ol lida blong luk from wanem pipol i wantem travel.

Mrs Meltenoven i talem se wan rison nao hemi from wok environmen mo salari long Vanuatu hemi low we hemi folem economic situation blong kaontri.

Hemi se Labour Dipatmen we i managem program ia hemi no save stopem ol pipol blong travel from Constitution(Mama loa) hemi alaoem pipol blong mekem own choice blong olgeta.