Moa pipol i tekem COVID stik-Torba

Eighty tri per cen taget population blong Vanualava, Ureparara, Motalava mo Mota i tekem fes dos blong COVID.

Torba Health Administrator, Steven Nako, i talem long VBTC Nius se hemia i gud tumas blong pipol i mekem raet choice blong stap sef.

Mr Nako i talem se ol fo aelan ia i kat 17 per cen blong populasen nomo blong tekem stik yet.

“Taget populasen long Vanualava hemi 1819 pipol, 1327 pipol i tekem stik we hemi 80 per cen blong pipol long aelan blong Vanualava,”Mr Nako i talem.

“Mo 20 per cen pipol i stil nid blong tekem stik.

“Motalava taget populasen hemi 1,o12, 760 oli tekem sti we yumi kaverem ap 75 per cen, 25 per cen i stap yet blo vaccinatem. Long Mota aelan, 178 oli tekem stik aot long totol taget blong 317 pipol, 139 pipol oli no tekem stik yet we i minim se 46 per cen oli tekem stik mo 44 per cen

“Long aelan blong Ureparapara 175 pipol i tekem stik, 65 per cen blong pipol i tekem stik aot long 267 taget populasen mbe 35 per cen i stap yet blong tekem stik.

Mr Nako i talem se i kat 1854 pipol long Gaua olsem taget populasen blong stik.

Hemi talem se taget populasen blong tekem stik long Merelava hemi 359 mo 570 long Torres grup.

“Mifala i vaccinate long ol fix site wetem Astrazeneca mo Sinopharem vaccine,”Mr Nako i talem.

“Mbe long ol temporari site mifala i stikim ol pipol wetem Astrazeneca nomo. I kat sam nomo pipol nomo we oli yusum Sinopharm long ol rimot eria.

“Mi save komen olsem se even we yumi kat ol hevi toktok long social media abaot vaccine mbe taem ol health wokman i stap wetem yumi long graon, ol pipol i wok tugeta wetem tim.

“Mifala i so fotunate blong kat tu health wokman i walkabot wetem mifala blong explenem ol kwesten mo ol kweri blong ol pipol.Plante pipol long ol rimot eria blong Torba oli no kasem gud infomesen blong COVID from problem blong netwok. Hemia i wan histri blong Torba afta long 40 yia blong kat ol medikol wokman we i kat plante save i kasem ol rimot pat blong Torba.

“Mi talem tankiu long ol Jif mo ol jej lida blong wok tugeta mo hemia ia nao i mekem moa pipol i tekem vaccine.”

Mbe Mr Nako i talem se weta i distebem tu rolaot blong vaccine long Torba.

“Yu we yu kam long Torba vinis bae yu save se majoriti blong ol seves we yumi provaedem hemi long ol banana bot i ko long ol aelan,”Mr Nako i talem.

“Weta hemi plei wetem mifala plante, taem solwota i strong mo raf, samtaem ol staff i mas riskim laef blong olgeta blong travel long ol smol bot ia blong ko stikim ol pipol long ol rimot aelan.

“Naoia wetem shotej blong fuel long Sola, Vanualava, blong ova tri wik yumi traem bes blong sosem fuel samples blong karemaot wok ia. Fuel i expek blong kam long wik ia mbe hemi wan toktok nomo mo evri wan i stap wet long hop.

“Mifala i kat nara six wik blong vinisim gud stik meresin long ol nara aelan blong Torba.

Mr Nako i talem tankiu long Vanuatu Red Cross society blong save help provaedem ol voluntia blong help aot wetem aroan ten wokman blong Torba Public Health.

“Mifala i stil open long ol nara sapot blong Kavman o ol nara Non-Government Organisation blong sapot blong rolemaot COVID vaccine kwiktaem,” Mr Nako i talem.

“Yumi kat wan banana bot blong Torba health nomo we yumi stap yusum mbe taem long taem blong deploymen, yumi mas askem bot blong ol nara kavman agency mo ol lokol.

Mr Nako i talem se Decemba 2 hemi deit we oli stat rolem aot seken stik blong COVID vaccine.

Hemi talem se i kat wan tim i stap long fix site long Sola blong givim aot ol seken stik blong Sinopharm mbe tu nara tim bae i kasem Gaua, Merelava mo Torres grup blong ol aelan.