Moa pipol i tekem stik meresin blong COVID

Ova 1000 pipol long Efate i tekem finis fes dos blong Astrazeneca vaccine long wik ia.

Olgeta ia, hemi ol frontline wokman olsem ol nurse, dokta, olgeta we oli wok long Airport, media, ol bisnis pipol mo sam nara ofisiol long Kavman mo tu sam memba blong pablik.

Director blong Public Health, Len Tarivonda, i talem se i bin kat sam memba blong pablik tu we oli no bin save long schedule blong vaccine rol aot long Efate,  mbe oli bin turn up mo tekem fes dos blong olgeta.

Hemi talem se kavman i gat wan gudfala system we i storem evri data blong ol pipol we oli tekem stik meresin ia long Convention Center long Port Vila.

“Afta long vaccination, long observation rum i gat ol ofisa we oli givim ol pipol we oli tekem vaccine sam personal informesen long wan kad,” Director Tarivonda i talem.

“Long kad ia, i gat deit blong nekis dos blong vaccine we ol pipol ia bae i ko tekem seken dose.

Sam pipol long rural eria blong Efate, i stap askem wea ples nao bae oli tekem stik meresin ia long hem.

Dr Sereana Natuman long Vila Central Hospital, i talem se i posibol blong helt tim i muv i ko long eria blong Paunangisu long Not Efate, afta long fes two wik ia we bae oli spendem long Convention Center.

 Spokespersen blong COVID-19, Russel Tamata, i talem se bae oli wok wetem ol eria kounsel long ol komuniti blong rolem aot vaccination program.

Director Tarivonda i kliarem tu se taem wan man we i vaccinate mo putum tu finga blong hem andap hemi minim leta V we i minim se vaccine.

Prioriti blong kavman hemi blong stikim ol frontline wokman ol pipol mo olgeta we age blong olgeta i above long 55 yia, mbe oli kasem oli sik blong Non-Communicable Disease.

Ministry blong Health i hapi long gudfala turn aot blong ol pipol we oli ko fowod blong tekem fes dos blong Astrazeneca vaccine.

Mr Tamata i talem se eim blong kavman i blong vaccinatem ol pipol blong stap sef nomata se Vanuatu hemi COVID fri.