Moa pipol long Ambae i tekem COVID vaccine

Ova 1000 pipol long East, Not mo Saot Ambae i kasem stik meresin blong COVID.

Manager blong Penama Public Health Manager, Markson Tabi, i talem se namba ia i mekem oli glad tumas from ol pipol long Not, East mo Saot Ambae i kam blong tekem stik akensem COVID long Saratamata long East Ambae.

Mr Tabi i talem se pipol i stat blong luksave impotens blong COVID vaccine mo data i soem se 68 Per cen i tekem vaccine.

“Aprisiatem ol jif mo ol komuniti lida blong advocate blong helpem pipol i kam tekem vaccine blong stap sef long virus ia we i stap long wol tete,”Mr Tabi i talem.

“Bae tim i stap long Saratamata blong tri wik blong kaverem ap ful populasen blong East, Not mo Saot Ambae.

“I kat ol mobile tim we oli ko raon long ol eria we i stap longwe long Not mo Saot Ambae.

“Long namba fo wik bae mifala i mekem wan outrij i ko long eria blong West Ambae blong tu wik.”

Mr Tabi i talem se afta long tu wik ia, oli sud openem fix site Bwatnapni long Central Saot Pentecost blong tri wik long ol pipol longwe.

“Taem i ko long namba fo wik blong hem, bae mifala i sendem wan tim i ko long saot Pentecost blong tu wik,” Mr Tabi i talem.

“Taem oli vinis, bae mifala i sendem olgeta i ko long Apatuntoara long Not Pentecost.”

Mr Tabi i talem se stik meresin ia hemi blong mekem se man i no sik bikwan long coronavirus.

“Taem oli ko stap longwe blong kasem taget populasen long Not Pentecost mbe yumi openem wan fix site long Nasawa long Central Maewo blong tu wik,” Mr Tabi i talem.

“Ale rolemaot fes temporari fix i ko long Kerepei Health Centre long Not Maewo.

Mr Tabi i talem se afta long eight wik, oli sud statem ol seken dos blong vaccine long Saratamata, East Ambae.

“Mi enkarejem ol jif, jej lida mo nara komuniti lida blong givim ol toksave i ko long ol pipol blong olgeta i ko karem stik medesin agensem COVID,”Mr Tabi i talem.

Long semak storian wan nara load blong 80,000 dos blong Sinopharm bai i kasem kaontri long wik ia.

Kavman i talem se folem hae demand blong vaksin ia, i bin gat wan diskasen wetem Chinese Ambassador long Vanuatu blong i gat moa Sinopharm vaccine long Vanuatu.

Ministry blong Helt i talem se fulap pipol oli prefer blong tekem sinopharm, mbe tugeta vaksin i mekem nomo semak woka mo World Health Organisation i bin apruvum.

VBTC Nius i kasem information tu se i gat sam pipol long ol provins we kavman i rolem aot vaccinate long hem i wandem sapos oli gat tu choice blong vaccine, oli save tekem Astrazeneca o Sinopharm vaccine.

Penama COVID vaccine lonj hemi long 26 October.

 

 

 

 

(Visited 145 times, 1 visits today)

About The Author

You might be interested in