Moa sapot -Jif’s nakamal

Handova blong VT100,000 tonasen i ko blong bildim bak jifs Nakamal i hapen tete.

Seremoni ia i hapen taem i lukim wan grup blong ol seasonal woka long wan town long New Zealand we oli singaotem Alexandera i mekem.

Oli mekem handova blong jek ia i ko long Presiden blong Malvatumauri Council blong ol Jif, Jif Wemal Tuwo Vanu Willy Grey Plasua.

Ol seasonal woka ia oli bin fomem wan komiti we oli kolem Alexandra Aexi Komiti taem oli stap long New Zealand mo hemia blong save mekem sapot i ko long ol afek komuniti long Vanuatu afta long tufala Saeklon.

Ol wok i stap ko hed long saed blong material

Long behalf blong Malvatumauri mo olgeta jif, Jif Gray plasua i talem bigfala tok tankio i ko long ol kotinu sapot we i stap kam long ol pikinini blong nasara ia we oli stap wok ovasea long ol skim.

Chief Executive Ofisa blong Malvatumauri kaonsel blong ol jif, Jif Jean-Pierre Tom i talem se wetem ol help olsem i mekem i posibol blong ol bigfala wok i stap kohed vinis blong tekem ol traditional material blong nakamal.

“I kat 12 bigfala post evriwan, ol natagura patch i abaot 15,000 evri wan, ol bamboo hemi ova 1200 bamboo we bae i kam” Jif Tom i talemaot.

Hemi talem se i kat plante mo traditional material we i inkludum ol bush rope mo plante nara mo bambae i kam iet.

Jif Tom i talem se long wik ia bambae oli wok blong klinimap ol las toti blong wud we faea i bonem mo nekis wik olsem ol stap blong stanemap ol pos blong nakamal blong ol Jif.

by Jamie Brown.