Motion blong saspendem ol Oposisen MP

Kavman hem i bin putum wan motion blong suspendem everi 22 Memba blong Palamen long fo konsekutif sitting blong Palamen.

Klak blong Palamen, Raymon Manuake i talem se wan nara kondisen we i stap long motion ia tu, hemi blong olgeta memba we oli suspend bai oli mas pem bak kos blong dileim palamen bifo oli kam bak long haus.

Wanem we hemi akri insaed long Palamen tedei bai hemi jas determinem hao bai palamen hemi prosid long ol dei we i stap kam.

Klak Manuake hemi adem se sapos i kat suspension blong 22 memba blong oposisen, palamen bae hemi stil save sidaon wetem majority blong ol MP we hemi stap.

Mo bae hemi afektem sitting alawens blong ol memba we oli no stap long palamen.

“Ol pipol konsen we motion ia hem i afektem olgeta oli stil gat raet blong oli sikim ruling blong kot long sapos hem i infringim o tekemaot sam raet blong olgeta anda long constitution,” hem i talem.

Deputy Praem Minista, Alatoi Ishmael Kalsakau i talem se risen blong kavman i putum motion akensem Oposisen Grup hemi from oli boycotem fes sitting blong Palamen.

Hem i talem se i nogat basis long allegation we Oposisen i tekem blong boycottem Palamen from oli se Minista blong Climate Change i bin brekem kwarentin rul mo ko long wan kwarentin fasiliti.

Hem i talem se hem ia hem i wan serious allegation mo accusation we ol Oposisen MP oli bin mekem.

Mr Kalsakau i talem se boycott blong Palamen ia hem i bin afektem plante institution we oli bin rere from fes ordinary sitting ia we i sud tekem ples long las wik.

Hem i talem se hem ia hem i wan bigfala expense tu blong kantri.

“Hem i no smolsmol mane mo hem i involfem ol bigfala institution. Tats wai mifala i mekem motion blong saspendem olgeta,” Mr Kalsakau i talem.

Long respon, Lida blong Oposisen, Ralph Regenvanu i talem se bae hemi no save kivim komen naoia, be hemi konfemem attendens blong oposisen long fes ordinary session long Tuesday 16 June.

(Visited 55 times, 1 visits today)

You might be interested in