Namba fo COVID repatriation flaet long tedei

Namba fo repatriation flaet blong olgeta stranded citizen mo residen bae i hapen long tedei.

Dipatmen blong Foren Afea i talem se flaet ia bae hemi kam long Fiji.

Daerekta blong Dipatment blong Foren Afea, Yvon Basil i talem se repatriation flaet blong Fiji tedei bae hemi i tekem araon 60 Vanuatu nasonal mo residen.

Daerekta ia i talem tu se ol nara repatriation flaet oli konfem vinis i stap.

“Long saed blong New Caledonia yumi stap wok yet mo posibol deit we yumi stap lukluk long hem, hem i long Mandei we i stap kam.”

“Ol arenjmen i stap kohed wetem olgeta airline mo tu wetem Kavman blong New Caledonia,” Mr Basil i talem.

Flaet blong New Caledonia ia bae i tekem samples long 57 repatriates everiwan.

Hem i talem tu se “nekis flaet we i konfem finis blong kam hem i hem ia blong Australia. Mo repatriation flaet ia bae hem i happen long namba 19 June, we hem i long nekis Friday.”

Repatriation flaet blong Australia ia bae i flaem samples long 170 pipol blong Vanuatu we oli stranded long Australia.

“Yumi wantem talem tankiu long Kavman blong Australia from hem i wan ofa we olgeta oli mekem blong oli save asistim yumi wetem repatriation flaet ia,” Daerekta Basil i talem.

VBTC i andastanem se flaet blong Australia bae hemi las repatriation flaet long fes steij blong eksasaes ia.

Seken steij blong repatriation bae i stat long fes wik blong August.

(Visited 946 times, 1 visits today)

About The Author

You might be interested in