Namele lif long projek blong Beverly Hills

Namele lif i bin stopem VT 71 million projek blong Beverly Hills Primary School long Efate long en blong June from i nokat gudfala akrimen.

Aksen ia ol diklea kastom ona blong kraon i tekem from i nokat gudfala akrimen bitwin olketa, divelopa mo Kavman bifo projek i tekem ples.

Projek ia Australia mo New Zealand i fandem.

Ol residen blong Beverly Hills Estate i wokap long wan moning mo sapraes tumas long namele lif long g blong konstraksen site.

Elder Yiopen Ham i talem se hemi wan long taem krae blong olgeta we kavman i ansarem.

Hemi talem se oli no hapi.

“Taem projek i bin ko hed mifala i glad from we mifala i wantem wan skul blong givim seves blong education long ol skul pikinini,” Elder Ham i talem.

“Mifala i harem nogud tumas from lif namele i stopem wok; mi wantem se ol kastoma owna i stretem olgeta.”

VBTC Nius i kasem toksave se wok i ko hed nomol bakeken long Monday wik ia.

Director General long Ministry blong Lands mo Natural Resource, Arthur Faerua, i bin konfemem se oli holem miting wetem ol kastom ona two taem long wik we oli hangem namele blong stretem isu we i stap.

Hemi asurem evri wan se wok long niufala skul ia bae i kam bak long wik ia taem ol pati konsen i saenem wan akrimen long wok tuketa mo settlem ap kleim we i stap.

“Director mo Minista blong Lands we tufala ol impoten pipol long ol lease arenjmen long Vanuatu, tufala i toktok wetem olgeta graon owna mo oli talem se bae oli openem bak site ia from i kat paymen arenjmen i stap,” Mr Faerua i talem.

“Ministry blong Lands i akri blong pem ol land rent mo sam nara fi blong hem.

“Yumi mas save se samtaem i pas, minista blong lands i mas akt olsem lessor long eria ia folem nomol proses blong yumi long lan reform act taem i kat ol dispute ova long graon. Mbe naoia long 2021 yumi diklarem kastom owna.”

Ministry blong Education mo Training i reisem konsen long wanem i hapen from i distebem wok.

Director General long Ministry blong Education mo Training, Bergmans Iati, i talem se oli bin kat akrimen wetem developa blong Beverley Hills sabdivision.

Kontrak blong bildim skul ia i sapos blong finis long August 2022.