National Futbol tim i witdro long Qatar

Vanuatu Football Federation i tekem strong disisen mo witdroem Vanuatu Tim long Qatar Futbol kompetisen from COVID.

President blong Vanuatu Football Federation mo Oceania Football Federation, Lambert Maltock, i talem se strik COVID rul i no posibol blong tim i ko hed blong patisipet.

Mr Maltock i talem se VT50 million budget blong kasem Qatar long Middle East mo plante yia blong wok i kam long en from COVID.

Hemi talem se afta long plante toktok, Executive blong Football Federation i disaed blong witdro aot long kem.

“Hemi difficult blong yumi save pleiem maj blong yumi long fes dei vinis akensem Tahiti mo tumoro akensem Solomon Islands,” Mr Maltock i talem.

“I had tu naoia blong kat wan tim blong plei akensem Solomon Islands.  Ol komiti memba i mas kam tete moning blong disaed se bae yumi witdro o bae yumi kontinu. Sapos yumi kontinu bae yumi kat wan smol jans nomo blong plei wetem Cook Islands. Mbe wanem nao pepes blong plei wetem las maj wetem Cook Islands from eim i blong kwalifae i ko long Wol Cup long seken steij.”

Mr Maltock i talem se i kat tri posibol wei long hao ol pleia i kasem COVID.

“Ating yumi kasem virus ia vinis long Vanuatu mo ko wetem; o seken posibiliti we hemi stap hemi ol pleia i kasem long plen. Mo nambatri hemi wan tv crew, Olsem i kat wan FIFA TV crew we i stap folem ap six captain long ol confederation ia. Brian Kaltack hemi wan mo taem hemi flae aot long Auckland(New Zealand) mbe i kat ol crew i kam long England blong filmem hem.”

Faen blong widrow aot long wan kompetisen hemi araon VT2 million, Mr Maltock i talem se faen blong no turn ap long kem hemi ova VT2 million.

Mr Maltock i talem se araon VT50 million budget blong priperem tim i ko long Qatar, naoia oli yusum ap araon VT31 million.

Mr Maltock i serem bigfala harem nogud long wanem we hemi biliv se hemi no rong blong eni man mbe COVID.

“Tim i statem priperesen blong olgeta i ko kasem las minit; olsem drim blong yumi hemi blong enterem festaem futbol blong Vanuatu long wan foreign graon we i neva hapen bifo apat long anda 20 wol cup long Korea bae hemi seken taem,” Mr Maltock i talem.

“Sam long olgeta pleia oli drim blong plei long wan niu stadium long futbol career blong olgeta.

Hemi talem se tim Vanuatu oli no sik nogud mo oli stap sef, mo bae oli travel i kambak long Vanuatu afta long 10 dei long Qatar.

Vanuatu Football Federation i talem tank yu long ol patna blong save sapotem tim Vanuatu.

 

(Visited 1589 times, 2 visits today)

About The Author

You might be interested in