National Housing polisi i mas kat

Wan National Housing Policy i mas kat blong katem daon fasin we ol pipol i liv long graon we i no blong olgeta.

General Manager blong National Housing Corporation, Levi Tarosa i talem toktok ia i no longtaem long Press Klab blong Vanuatu topik long hao nao 13 Legislature i save adresem muvmen blong ol man mo problem blong graon?

Mr Tarosa i kol long niu kavman blong fokas moa long National Housing.

“Council blong ol Minista i mekem wan disisen long Decemba 2020 blong setem ap wan tasfos blong ristrakjarem; Yumi pasem COM disisen be i nogat wan samting i hapen kasem tete. Hemi to do wetem will mo komitmen blong kavman,” Mr Tarosa i talem.

“Mi stap kol long niu kavman blong kam in mo risosem, yumi glad long wan program we wol bank i fandem we i bin lonj long tu manis, Vanuatu Affortable Resilence Program mo hem nao bae i mekem graon i afotabol mo ol settlemen long Port Vila oli impruvum sanitation blong olgeta. Hemia hemi ol eria we kavman i nid blong lukluk long hem. Hemia i wan program we hemi araon VT25 million US dola. Hemi jes tajem wan smol pis blong bigfala problem we i stap. Mo sapos yumi i no stap plan gud bae yumi luk moa samting olsem i kam antap long fuija.”

Mr Tarosa i talem se National Housing Corporation act nao wok blong hem i blong lukluk long ol man we oli winim smol vatu nomo mbe provaedem aos we oli save pem.

Hemi wan bigfala jalenj blong tekem bak institution ia i ko antap.

Mr Tarosa i talem se fulap haos tete praes i hae.

“Mi stap long industry blong sam taem mo key samting we mi luk nao hemi afotabiliti,” Mr Tarosa i talem.

“Sapos yumi wantem mekem land hemi asesabol mo afotabol yumi mas lukluk long national housing,” Mr Tarosa i talem.

 

 

(Visited 120 times, 1 visits today)

About The Author

You might be interested in