Navigation problem -ATR72-600 plen

ATR72 blong Air Vanuatu we i jes kambak long meintenens hemi bin stuck i stap long Tanna folem wan nara problem.

Long wan steitmen, National Airline hemi konfemem mo talem se hemi no wan mechanikol problem be wan isu long system blong navigation blong hem.

Plane hemi bin flae i ko long Tanna long yestete mo hemi stap kasem tete.

Ol enginia oli bin ko daon long Tanna yestete afternun blong lukluk long problem ia mo submitim asesmen blong olgeta i ko long Civil Aviation blong askem plane ia blong i flae kambak long Vila.

Sos oli rivilim se ATR72-600 hemi ova naet long Tanna from wan engine problem.

Hemia afta long eight wik meintenens long Singapore.

I kat konfemesen se ol enginia blong airline oli ko daon long Tanna blong lukluk long isu ia.

Sam schedule flaet blong airline i bin kansel.

Air Vanuatu i rispon blong talem se ATR i jes ko long Singapore blong mechanic meintenens. Mo isu we i presen long yestete hemi no mechanikol.

Folem nomol sefti proses, ol Engina blong Air Vanuatu i komplitim wan risk asesmen. Nomol proses hemi blong asesmen i pas long Civil aviation. Ol enginia blong Air Vanuatu i rikwestem se plen i mas kambak long Port Vila blong mekem moa inspeksen afta long apruvol long Civil Aviation.

Hemia hemi nomol proses blong eni event. Air Vanuatu i konfemem se plen ia i save flae. Mo blong kipim sefti long foret, Air Vanuatu i rikwestem se bae hemi kambak witaot ol pasenja blong ripea long komputa system.

Hemia hemi ol nomol sefti rul we eni air operata i nidim blong tekem long ol situasen olsem. Hemi from wanem Air Vanuatu i rikwestem blong kavman i apruvum ol plan blong moa plen. So taem situasen olsem i ko antap, i kat wan seken plen we bae i ko hed blong flae taem ripea i stap ko hed.

Aircraft blong Air Vanuatu i bin karem bak operesen blong hem stat long wik ia

Plen ia i bin go long seves long Singapore molong absens blong hem, Fiji Airways i ranem ol domestic flaet operesen blong hem.

ATR72-600 aircraft i bin spendem eight wik blong ko tru long nomol mentenens operesen blong wan plen.

Hemi statem domestic mo regional flaet blong hem long tete Novemba 16 i ko long Tanna, Santo, Fiji mo New Caledonia.

Manejmen blong Air Vanuatu i talem se long absens blong aircraft ia hemi gat working patnasip wetem Fiji Airways blong hemi tekemap ol nomol routine blong aircraft ia.

Hemi se Fiji Airways i ko bak finis afta we plen blong Air Vanuatu i kasem bak kaontri mo bambae oli kipim patnasip we oli enkej long hem.

Hed ofis blong Air Vanuatu i talem se presens blong ATR plen bambae i kivhan long hae namba blong pipol mo cargo we i travel i ko long aelan.

Long semtaem Vanuatu i stap go klosap long festive season ATR72-600 bambae i kam wan bigfala riliv long olgeta pipol we oli wantem ko krismas mo niu yia long aelan.

I semak long olgeta long aelan we oli wantem long taon blong krismas mi niu yia selebresen.

 

(Visited 1043 times, 1 visits today)

About The Author

You might be interested in