Netwok wan jalenj yet long Vanuatu

Wan netwok survey long Vanuatu long yia 2020 i soem se plante aelan i nokat askes long telecommunication yet.

Regulator blong Telecommunication Radio-communication mo Broadcasting Regulator, Brian Winji, i talem se survey ia i soem se telekomunikesen netwok i stil wan bigfala jalenj blong impruvum.

Eim blong Telecommunication Radio-communication mo Broadcasting Regulator i blong wok tuketa wetem ol telecommunication provaeda blong mekem sua se pipol i kasem seves blong netwok blong ol kavman seves mo bisnis aktiviti olsem education, health, tourism, trade, mo agriculture ol pipol i kat akses long hem.

Mr Winji i talem plante eria long ol aelan blong Vanuatu i no kasem yet netwok blong tufala telekomunikesen opereta long kaontri, Vodafone mo Digicel Vanuatu Limited.

“Long yia 2014, Telecommunication Radio-communication mo Broadcasting Regulator i bin awodem kontrak long Vodafone, Digicel mo Telsat blong inkrisim netwok coverage tru long Kavman Universal Access Policy Fund blong faev yia, mbe oli mas kivim bak mani ia.

“Yumi mekem survey mo yumi faenem aot se i nidim moa wok blong Vanuatu i kasem 100 per cent blong netwok coverage.

“Long fes phase ia, yumi wok long 22 site olsem long sam eria long Torres, Vanua Lava, Santo, Maewo, Ambae, Malekula, Pentecost, Epi, Tanna mo Aniwa.

“Hemia i wan bigfala ajivmen mo wan mileston blong Kavman mo pipol blong Vanuatu from ol tri pleia ia, Telsat, Digicel mo Telsat i mekem ol gudfala wok ia wetem ol own kost blong olgeta.

“Afta long ol wok ia blong faev yia, yumi mekem wan coverage audit mo yumi prisentem long kavman long 2020, mbe i stil kat plante komplen long ol lokol se oli no aksesem netwok coverage yet.

Chief Executiv Ofisa blong Vodafone Vanuatu Limited, Barlen Lutchmoodoo, i admitim se jalenj we oli fesem hemi from Vanuatu i kat plante aelan wetem tumas hil mo creek we i mekem se oli no ajivim target blong network coverage.

“Mi tink se Telecommunication Radio-communication mo Broadcasting Regulator i mas wok wetem mifala ol telecommunication operata blong luk hao yumi save help tru long ol fand sapos yumi wantem 100 per cent coverage long Vanuatu,” Mr Lutchmoodoo i talem.

Presiden blong Torba Provins, Edmond Harry Sovan, i talem se netwok coverage long aelan blong Ureparapara, Merelava, West Gaua, Mota mo Merig wetem ol nara pat blong Torres Islands i nokat nomo.

“Pipol i faenem i had we blong komuniket wetem ol pipol long sam aelan ia long Torba from i nokat signol blong netwok,” Mr Sovan i talem.

Mr Winji i talem se aot long coverage audit ia, oli faenem ova 6o niu netwok site blong wok long hem.

“Yumi plan long wok long sam eria long kaontri we oli kat coverage vinis mbe netwok i wik ; olsem ol pipol i walkbaot smol distens araon blong faenem wan ples blong kol,” Mr Winji i talem.

“Mo bae yumi wok long ol ples we i nokat coverage nomo long hem.

Telecommunication Radio-communication mo Broadcasting Regulator i talem tankiu bigwan long kavman blong extendem wok ia blong oli save impruvum netwok coverage long ol aelan blong Vanuatu.

Vodafone Vanuatu Limited i sabmitim tenda aplikesen finis blong traem adresem ol niu site ia.

“Mifala i wet long fidbak blong regulator risponsibol long wanem sapot bae oli provaedem from long en blong dei hemi wan kost exercise we bae mifala i spendem vatu,” Mr Lutchmoodoo i talem long VBTC Nius.

“Mifala i wantem luk plan mo nidim sapot blong regulator from mifala i nosave wok mifala wan.”

Loh site long Torres Islands hemi jus folem pat blong kavman Universal Access Policy long 2014 blong mekem sua se seves i kasem ol eria we i nokat telecommunication seves nomo. Telecommunication Radio-communication mo Broadcasting Regulator i talem se ajivmen ia i provaedem komunikesen akses long pipol blong Torres mo raon long Wol, mo tu provaedem akses long social mo economic aktiviti. Blong bildim wan netwok long wan rimot eria olsem Loh, i kam wetem bigfala jalenj olsem logistic wetem kost. Mbe no mata long ol jalenj ia, netwok i bilt mo nao ia hemi operate.

Sanma Presiden, Malmalangi Tavui, i talem se Santo hemi bigfala aelan blong Vanuatu mbe netwok blong Digicel mo Vodafone i nogud nomo.

“Ol eria olsem Big Bay bush, Big bay inlan, West mo not west Santo mo saot Santo, pipol i fesem had taem blong toktok long fon,” Mr Tavui i talem.

“Kavman i mas luksave from taem i nokat netwok, pipol i strakol blong kasem ol impoten infomesen blong saeklon o tsunami blong oli pripea blong stap sef o ol emergency blong ko long hospital.

VBTC i bin traem blong toktok wetem Digicel Vanuatu Limited blong hemi talemaot ol konsen blong network coverage mbe i no posibol.

Long saed blong Telsat i gat jenj long onasip mo oli stap konsentret long wan niu projek naoia blong wok long netwok coverage.

Telecommunication Radio-communication mo Broadcasting Regulator i askem sapot blong ol jif mo helpem kavman mo tufala telecommunication netwok provaeda blong mekem sua se seves blong netwok i kasem komuniti blong olgeta.

Mo wok i expek blong stat i no longtaem.