New Zealand blong impruvum wokman scheme

Vanuatu i askem New Zealand blong lukluk bak mo impruvum pay blong Regional Seasonal Employer scheme we ol Ni-Vanuatu wokman i involv long hem.

High Commissioner blong Vanuatu long New Zealand, Jimmy Nipo, i mit wetem New Zealand Chief Executiv Ofisa blong Horticulture long wik ia blong lukluk long isu blong moa wok long ol farm mo longfala haoa mbe pay i no majem wanem oli mekem long farm.

Mr Nipo i talem se Kavman blong Vanuatu i disaed blong lukluk bak long seasonal scheme ia from foren karensi we ol wokman i stap karem i kambak long kaontri i bigwan tumas mo i stap help groem ekonomi.

VBTC Nius i kasem ripot se diskasen ia kavman blong New Zealand i akri long hem mo bae i kat moa toktok.

Wan lokol seasonal wokman we i bin pat long scheme ia long New Zealand we i no wantem talemaot nem blong hem, i talem se hemi bin wok long wan Grapes farm long Saot New Zealand mo mani hemi gud.

Mbe hemi talem se i gud blong kat sam diskasen olsem from i kat sam farm we ol wokman i wok long haoa mbe mani i nogud.