New Zealand i lusum ol experiens seasonal wokman

New Zealand bae i fesem soteij blong ol experiens wokman long sam manis.

Radio New Zealand i ripotem se Richard Palmer, Summer New Zealand Acting Jif Executiv, i talem se, “Blong tekem olketa man long New Zealand blong wokem ol wok ia long region hemi wan bigfala jalens blong mifala.”

Mr Palmer i talem toktok ia folem riten blong ol Recognised Seasonal Employer (RSE) wokman blong Vanuatu.

Hemi talem se mesej blong olketa i ko long ol pipol blong New Zealand se, “I kat plante wok i stap naoia.”

Alistair Mitchell, Thornhill Contracting South Island Maneja long New Zealand, i talem se 21 Ni-Vanuatu wokman blong hem oli kam long Vanuatu tete afta we oli bin stap sins Octoba 2019.

“Naoia mi no save wanem bae i hapen long nekis summer mo weta COVID-19 boda rul bae i mekem moa jalens blong ol wokman ia i kambak long New Zealand,” hemi talem.

“Taem we summer i bin vinis, mifala i bin trenem ol 21 seasonal wokman ia blong wok long Winter long vineyard olsem pruning.

“Sekta ia hemi rilae long ol Recognised Seasonal Employer wokman blong fulum ap spes ia mo mifala I glad bigwan long had wok blong olgeta.”

Mr Mitchell i enkarejem ol pipol blong New Zealand blong stanap mo wok, folem Summer we i stap kam.

Long sem taem, Nawala Narukase blong Tanna i talem se hemi glad tumas blong kambak long Vanuatu.

“Mi bin stap long New Zealand blong six manis long Summer mo nine manis long Winter,” hemi talem.

“Bae mi ko tru nomo long kwarentin blong 14 dei afta mi ko long haos.

“Mo sapos boda i open bakeken bae mi kobak long nekis sisen.”

Jif Executiv Ofisa blong Summer New Zealand i talem tu se, “Mi luk se ol wokman ia oli glad tumas blong ko bak hom.”

“From oli stap longtaem tumas long ples ia mo impoten samting nao se oli bin wok tru long wan lok daon blong COVID-19 olsem mo contribute long wan impoten servis long saed blong frut prodaksen,” Mr Palmer i talem.

“Mo naoia hemi stret blong go bak.”

Mr Palmer i talem long Radio New Zealand’s Morning Report se plante long ol seasonal wokman blong New Zealand ia, oli kamaot long ol vilij we Saeklon Harold i damejem.

(Visited 2085 times, 1 visits today)

You might be interested in