New Zealand i rikodem tu niu COVID-19 kes

New Zealand hem i rikodem long Tuesday, tu niu kes blong COVID-19 afta we oli diklerem se kaontri ia i fri long virus ia.

1 News long New Zealand i ripotem se tufala niu COVID-19 kes ia we oli bin rikodem long Tuesday hem i tufala woman. Wan hem i stap long age blong 30 mo narafala long age blong 40. Tufala ia i bin kambak long UK long eli manis ia.

Daerekta Jenerol blong Helt long New Zealand, Dr Ashley Bloomfield i talemaot long Media tedei se tufala woman ia oli bin kambak long New Zealand long 7 June mo stap long isolation long wan hotel long Auckland.

“Wan niu kes hem i samting we yumi hop blong no mas gat be hem i wan samting we yumi bin plan from,” Dr Bloomfield i talem.

Oli bin alawem tufala ia blong travel i ko long Wellington long wan praevet trak long June 13 from oli sori long olgeta.

1 NEWS i andastanem se oli bin alawem olgeta blong ko long wan ded blong wan famili memba blong tufala.

“Oli nogat kontak wetem eniwan. Oli no bin yusum eni pablik fasiliti mo oli bin stap wetem wan single famili memba,” Dr Bloomfield i talem.

Dr Bloomfield i talem se ol pipol we tufala woman ia i bin gat kontak wetem olgeta hem i long sem flaet blong Air New Zealand we i kam long Brisbane mo olgeta we tufala woman ia oli bin stap wetem olgeta long isolation fasiliti long Auckland.

Hem i talem se bifo oli ranem test long olgeta, wan long tufala i bin stap soem sam smol saen blong sik ia.

Tufala woman ia i bin ko tru long tes long Wellington.

Dr Bloomfield i talem se hem i stap adem wan rul naoia blong mekem sua se eniwan we i lego wan isolation fasiliti hem i mas soem wan nekatif COVID-19 tes.

Hem i talem se pesen we hem i stap long risk naoia hem i single famili memba ia we hem i bin gat wan klos kontak wetem tufala.

Hem ia i putum namba blong totol kes blong COVID-19 long New Zealand i ko long 1,506. Wan totol blong 22 pipol oli bin ded from virus ia long kaontri ia.

New Zealand hem i jas diklerem nomo long manis ia se hem i fri long coronavirus.

(Visited 18 times, 1 visits today)

About The Author

You might be interested in