Nid blong incubator long Vila Central Hospital

VBTC staff social club i stap organisem wan fes eva radiothon blong raisem vatu tuwods ol life save masin blong ol bebe long Vila Central Hospital long wik ia.

Presiden blong VBTC social club, Leah Lowonbu, i talem se hemia blong sapotem fundraising we mein hospital i statem vinis long las yia.

Hemi talem se “Eim blong yumi hemi blong kasem plante man blong oli save donate.”

“Mifala i stap kol long ol bisnis aos, ol lida, ol grup, Non- Government Organisation mo ol individuol blong kam donate long Friday namba 22 mo Saturday 23 ia long eria blong VBTC long Port Vila,” Ms Lowonbu i talem.

“Paradise 98 FM bae hemi live blong 36 haoa wetem DJ saiprez mo hemia bae i stat long 6am fridei kasem satete 6pm long evening.

“Dj saiprez nao hemi olsem mein host blong event ia mo long taem ia bae hemi no silip, hemi wan unique samting we VBTC staff social club oli putum tuketa wetem sapot blong VBTC.

“VBTC hemi givim fri air taem blong 36 haoa ia mo mifala i stap putum 1000vt long wan haoa we bae i totol ap long ova VT 2 million we yumi stap lukluk blong reisem.

“Plis kam sapot, yu we yu stap ovasi o long aelan, yu save folem mifala long VBTC fesbuk pej blong karem infomesen mo save sapot.

“Rememba se donation blong yu bae i ko tuwods wan gudfala samting we bae i benefitim kaontri.”

Dr Orelly Thyna long Vila Central Hospital, i talem se oli stap lukluk blong mas karem 20 niu incubator blong save mitim demand we i stap naoia.

Hemi talem se long las yia, Vila Central Hospital i rikodem aroan 309 bebe we oli nidim incubata from i kat 25 bebe oli bon long wan manis mo oli nid blong stap insaed long glass.”

“Ol incubator ia, i kat plante detekta long saed blong hem, we i letem mifala i save se bebe ia temperaja blong hem i kolkol mo yumi save wome ap hem.

“Samtaem environemen we hemi slip long hem i kolkol mo yumi nid blong hitim ap blong mekem ples i wom.

“Mo sapos ol samting ia i nokat bae bebe i save kolkol tumas mo hemia bae oli ko tru long plante problem.

“Resen ia nao mifala i wantem moa incubator kwiktaem blong stopem problem ia.”

Dr Thyna i talem se taem i kat ol niu incubator wetem ol niu masin blong help bae oli save provaedem gudfala seves we Ministry blong Health i stap talem.

“Hemi tekem wan kasem tu manis blong incubation period mbe evri shift long Maternity ward i kat wan new bebe we i nidim incubator masin,” hemi talem.

“Plante long bebe oli no save finisim gud incubation period blong olgeta insaet long machine ia.

Plante oli mas removum olgeta blong letem olgeta we oli moa sik oli go insaet.

Mo olgeta we oli stap outsaet, oli mas putum hem long wan kona blong rum we i wom, mbe hemi very risky long ol pikinini.

Wan incubator hemi estimate blong kost VT 200,000.

 

 

(Visited 198 times, 1 visits today)

About The Author

You might be interested in