Niu bod blong TSC bae i apoint

Apointmen blong niu bod blong Teaching Service Commission bae i hapen long wik ia.

Minista blong Education mo Training, Bruno Leingkone i konfemem long VBTC Nius se fes miting bae i hapen long Wednesday.

Hemia i folem oda we Head blong State blong Vanuatu i bin muvum aot ol memba blong Teaching Service Commission long January ia.

His Excellency, Nikenike Vurobaravu i muvum aot olgeta ia folem oda namba – 6 blong 2023 beis long paragraf 5 (2) (a) blong Teaching Service Act namba 38 blong 2013, mo seksen 31 blong Intepreteson Act, CAP 132.

Oda ia i no stetem eni rison blong muvum aot olgeta, mbe i talem nomo se i muvum aot Ms Alice Kalo, Hardison Tabi, mo David Narai olsem memba blong Teaching Service Commission.

I kat alegesen se termination blong foma commission hemi from oli saspendem ol tija.

Presiden Vurobaravu i saenem oda blong rimuvol ia long namba 25 Januari, 2023.

Ripot i talem se miting blong olgeta ia bae i apoentem jeaman blong commission ia.

Ofis blong Teaching Service Commission, i talem long VBTC Nius se i bin kat 23 tija evriwan we foma commission i saspendem olgeta mbe tri long olgeta i ko bak tij bakegen tru long arenjmen wetem foma commission mo i kat 19 i saspen ia naoia.

Minista Leingkone i talem se fes ajenda blong niufala Teaching Service Commission hemi blong putum bak 19 tija long wok blong olgeta olsem ol tija we foma commission i saspendem olgeta.