Niu cemetry blong redi-March

Niu Cemetry blong Port Vila long Eratap bae i rere long March.

Town Clerk blong Port Vila Municipal Council, Peter Sakita i konfemem long VBTC Nius long tete.

Hemi talem se 80% blong kliaring long faev hectare i ko hed mo hemia nao bae oli stat blong yusum festaem blong berem ol ded man long hem.

Mr Sakita i talem se bae oli yusum fasin blong Double Burial we oli wan plot nomo mbe tu man i save slip long hem.

“Mifala i stat wok long faev hekta blong graon i ko hed vinis, mo ol graon we i stap bae yumi wok long hem afta; Hemia hemi olsem fes phase,” Mr Sakita i talemaot.

“Bae yumi stat blong bildim sam toilet mo shed blong pipol i save yusum. Mo yumi stap lukluk se long March 2023 yumi stat yusum graon blong berial.

Araon VT29 Million we kavman i pem long developa blong Port Vila Memorial gardens. Hemi wan 20 hectare blong graon.

Mr Sakita i talem tankiu long help blong Dipatmen blong Urban Affairs blong save help blong pem sam material.

“Wok blong acquirem graon ia hemi stap ko hed long ol kastom owna,” Mr Sakita i talemaot.

“Eria blong priperem ia hemi blong nekis ten yia. Bambae yumi planem moa grass mo flower blong mekem ples i naes mo bae i kat ol rod mo difren seksen.

“Bambae mifala i luk blong mekem sam mani blong kavermap ol cost. Mo ol niu reit bae kamaot we bae i inkris. Council apruvum bifo i kamaot long pablik.

“Ninety-Five percent blong wokfos hemi ol lokol blong Eratap. I kat ol opereita mo sam foreman nomo we oli kam supervisem mbe majoriti hemi ol pipol long vilij we jif i kivim i kam.”

Supervisor we i lukaotem ol lokol we oli stap wok long cemetry site, Christiong Alban i talem se oli stat mekem kliaring long en blong 2022.

Mr Alban i talem se ren i distebem wok mbe wok long faev hekta i stap ko hed gud.

Hemi talem se oli 10 boy Eratap we oli stap wok.

Mr Sakita i talem se bae i kat wan chapel mo cremation(Fasin blong bonem ded man) tu oli stap lukluk long hem long seken phase.

Hemi talem se cemetry long town i fulap mo oli stap yusum ol smol spes nomo.

Current burial fi hemi VT 37,000.

 

 

 

 

(Visited 206 times, 1 visits today)

About The Author

You might be interested in